Бүгін Жамбыл облысының әкімі Ербол Қарашүкеев 2025 жылдың шілде айының соңында Мойынқұм ауылында болған атысқа қатысты пікір білдірді, деп хабарлайды Zakon.kz.

Аймақ басшысы Мойынқұм ауданында жастардың қатысуымен қоғамдық тәртіптің бұзылуына байланысты құзырлы органдар қажетті шараларды қолға алып жатқанын атап өтті.

"Мойынқұм ауданындағы оқиға – басты назарда.Жастар арасында болған құқықбұзушылыққа байланысты тиісті органдар шұғыл әрекет етуде. Мемлекет басшысы Қасым-Жомарт Тоқаев атап өткендей, заң үстемдігі мен қоғамдық тәртіпті сақтау – мемлекеттің басты міндеттерінің бірі. Бұл істе ешқандай кешірім болмайды – күдіктілер заң аясында жауапқа тартылады. Жастар – ел болашағы. Сондықтан тәртіп пен заңды сақтау, адамгершілік пен жауапкершілікті сезіну – әрбір жастың борышы. Қоғамдағы тыныштық пен бейбіт өмір – өзара құрмет пен мейірімнен басталады. Барша жастарды тәртіпті болуға, бір-біріне сыйластықпен, түсіністікпен қарауға, арандатушылықтан аулақ болуға шақырамын. Біздің басты мақсатымыз – қауіпсіз, әділетті және бірлікке негізделген қоғам құру", – деп жазды Ербол Қарашүкеев 1 тамызда Instagram желісінде.

Ол "барлық жастарды байсалдылықты сақтауға, арандатушылықтан аулақ болуға және қоғамдық келісімді нығайтуға үлес қосуға" шақырды.

Посмотреть эту публикацию в Instagram

Публикация от Ербол Қарашөкеев (@erbol_karashokeev)

2025 жылы 29 шілде күні кешке Жамбыл облысы, Мойынқұм ауданы, Мойынқұм ауылында атыс болып, оның салдарынан төрт адам травматикалық қарудан жарақат алды. Зардап шеккендер аудандық ауруханаға жеткізілді. Аталған факті бойынша Қазақстан Республикасы Қылмыстық кодексінің 24-бабының 3-бөлігі – 99-бабының 2-бөлігімен қылмыстық іс қозғалды. Кейін полиция атысқа қатысы бар деген күдікпен төрт адамды ұстағаны белгілі болды.