Премьер-министрдің орынбасары Роман Скляр министрлер кабинетінде өткен брифингте қазақстандықтарды алаңдатып отырған – пәтер бағасының көтерілуіне қатысты сұраққа жауап берді, деп хабарлайды KAZ.NUR.KZ тілшісі.

БАҚ өкілдері жаңа Салық кодексі енгізілгеннен кейін ел тұрғындары арасында Қазақстанда баспана 20 пайызға қымбаттайды деген алаңдаушылық бар екенін жеткізді.

Бұған Роман Скляр жаңа Салық кодексі қарапайым азаматтарға еш әсер етпейді деп жауап берді.

"Биыл біз жалпы ауданы 19 млн шаршы метрден аса тұрғын үй салуға тырысып жатырмыз және саламыз, баспана құны нарықтық әдіспен реттеледі. Бірақ мемлекеттің тапсырыс беруші ретінде жеке құрылыс салушылардан баспана алу тәжірибесі шамаман 10 жыл бойы өз нәтижесін беріп келеді.

Бізде тұрғын үй бағасы тым қымбат емес. Мен бизнес-класс немесе элиталық тұрғын үй сегменті туралы емес, эконом санатындағы тұрғын үйлер туралы айтып отырмын. Оның бағасы өзіне лайықты дәрежеде. Біз бұл жерден бағаның күрт ауытқығанын көріп тұрған жоқпыз", — деді ол.

Оның айтуынша, жаңа Салық кодексінің қабылдануы бизнесті бөлшектеу әдісіне тосқауыл қояды.

"Мына жағдайда, олар салық төлеген кезде аз табыс табады. Бірақ соған қарамастан, жобалық-сметалық құжаттарға сәйкес, біз аз қамтылған азаматтарға жасап жатқан мемлекеттік тапсырысқа сәйкес, "Бақытты отбасы", "Наурыз жұмыскер" бағдарламалары аясында баға параметрлерін реттейміз.

Нарықтық жолмен, бірақ баға реттелетінін баса айтқым келеді" — деді премьер-министрдің орынбасары.

Мәтіннен қате тапсаңыз, бізге жазыңыз