2026 жылдан бастап әкімдерге жаңа KPI енгізіледі. Бұл халықтың нақты жұмыспен қамтылу көрсеткіші.

Бұл туралы Премьер-министр Олжас Бектенов Үкімет отырысында мәлімдеді. Енді әкімдердің тиімділігі қағаздағы есеппен емес, жаңадан ашылған жұмыс орындары арқылы өлшенеді. Сaravan.kz медиа порталы жалғастырады.

Жұмыссыздық деңгейі үшін жергілікті билік тікелей жауап береді. Үкімет басшысы әкімдерге нақты талап қойды. Сондай-ақ еңбек нарығының цифрлану деңгейі мен жұмыспен қамту бағдарламаларының нақты нәтижесі де ескеріледі. Ал көрсеткішке жете алмаған әкімдерге қандай шара қолданылатыны әзірге белгісіз.

Жұмыссыздық: алаңдатарлық статистика және нарықтың қажеттілігі

Соңғы мәліметтерге сәйкес, Қазақстанда 120 мыңнан астам жас жұмыссыз тіркелген. ЕАЭО елдері арасында антирекорд орнаттық. Қазақстан 350 мың жұмыссыз азаматпен көш бастап тұр. Салыстыру үшін айтсақ, Қырғызстанда бұл көрсеткіш – небәрі 47 мың адам.

Бұл ретте, алдағы бірнеше жылда елімізге 3 миллионға жуық маман қажет болады. Ең көп сұранысқа ие салалар:

• қызмет көрсету;

• логистика;

• өнеркәсіп;

• ауыл шаруашылығы;

• құрылыс.

Сонымен қатар, нарыққа жаңа мамандықтар керек. Дрон операторлары, жасанды интеллект мамандары, киберқауіпсіздік инженерлері сияқты мамандарға сұраныс артып келеді. Бірақ білім беру жүйесі мен еңбек нарығы бұл өзгерістерге ілесе алмай отыр.

Жұмыс іздеуде жасанды интеллект көмекке келеді

Министрлік жасанды интеллект негізіндегі жаңа жүйені іске қоспақ. Ол пайдаланушының профиліне және нарықтағы сұранысқа сай келетін бос орындар мен оқыту курстарын автоматты түрде ұсынатын болады. Қазір Қазақстанда сұранысқа ие мамандықтар саны – 8 мыңға жуық, ал оларға сай 11 мыңнан астам білім беру бағдарламасы жаңартылған.

Алайда, түлектердің 30%-дан астамы мамандығы бойынша жұмыс істемейді. Себебі, көпшілігі мамандықты қызығушылығына емес, гранттың болуына қарап таңдайды. ҰБТ балы жетпеген соң, қалаған салаға емес, қайда тегін оқыту болса, соған барады.

Осылайша, еліміз еңбек нарығында жаңа бетбұрыс жасамақ. Енді жұмыссыздық үшін жауапкершілік әкімдердің иығында, ал жасанды интеллект сияқты сандық құралдар мемлекеттік стратегияның құрамдас бөлігіне айналуда.