Қазақстанның ұлттық статистика жүйесі халықаралық стандарттарға толық сай деп танылды. Экономикалық ынтымақтастық және даму ұйымы (ЭЫДҰ) еліміздің тиісті статистикалық практика жөніндегі ұсынымға қосылғанын ресми түрде растады

Бұл туралы Caravan.kz медиа порталы baq.kz-ке сілтеме жасап хабарлайды.

Бұл – ЭЫДҰ-ның статистика саласындағы алғашқы құқықтық құжатына ТМД елдері арасынан алғаш рет қосылған мемлекет ретінде Қазақстан үшін маңызды жетістік.

ЭЫДҰ ұсынымы – ресми статистиканың тәуелсіздігі, объективтілігі, ашықтығы мен сапасына бағытталған 12 қағидатты қамтитын жаһандық стандарт. Қазақстан бұл құжатты мойындаған 44-ші мемлекет және ұйымға мүше емес серіктестер арасында алғашқы ел атанды.

Ұлттық статистика жүйесінің сапасы жоғары деңгейде екенін дәлелдеді

Ұйымның мұндай шешімі 2023–2025 жылдарға арналған Қазақстанның статистикалық жүйесіне жүргізілген жан-жақты шолу нәтижесінде қабылданды. Құжатта еліміздің статистиканы цифрландыру, заманауи әдіснамаларды енгізу және деректерді пайдаланушылар арасында сенімділік қалыптастыру бағытында қол жеткізген ілгерілеуі ерекше атап өтілді.

ҚР Стратегиялық жоспарлау және реформалар агенттігіне қарасты Ұлттық статистика бюросының басшысы Мақсат Тұрлыбаев бұл жетістікті еліміздің халықаралық беделі мен институционалдық даму деңгейінің көрсеткіші ретінде бағалады.

Бұл – Қазақстанның статистикалық жүйесіне берілген жоғары баға. Ол ресурстардың жеткіліктілігі, деректердің құпиялылығын сақтау, заманауи құқықтық және институционалдық негіздің болуы, сондай-ақ жаңа әрі баламалы дереккөздерді тиімді қолдану сынды маңызды талаптарға сай келеді. Статистика сапасы — тиімді басқарушылық шешімдердің негізі. Біз осы стандартты сақтап қана қоймай, оны жетілдіруді жалғастырамыз, — деді ол.

Халықаралық серіктестікке сенім арта түсті

ЭЫДҰ Бас хатшысы Матиас Корманн да Қазақстанның бұл саладағы даму қарқынына жоғары баға беріп, елдегі сапалы әрі сенімді статистика жүйесін нығайту бағытындағы ұмтылысты қолдайтынын білдірді.

Біз ынтымақтастығымызды жалғастырып, Қазақстанда институционалдық негізі берік, сапалы статистикалық инфрақұрылымды дамытудағы барлық бастамаларды қолдауға дайынбыз, — деді ол.

Қазақстанның ЭЫДҰ ұсынымына қосылу жұмысы ҚР Сыртқы істер министрлігінің қолдауымен жүзеге асқанын да айта кеткен жөн. Бұл бастама еліміздің жаһандық ақпараттық кеңістіктегі рөлін нығайтып, статистика саласындағы үздік халықаралық тәжірибелермен терең ықпалдасуына жол ашты.