Жамбыл облысының денсаулық сақтау басқармасы өкілдері жол апатынан зардап шеккен Шавкат Рахмоновтың әйелі мен ұлының жағдайы туралы мәлімет берді, деп хабарлайды ведомствоның баспасөз қызметіне сілтеме жасаған KAZ.NUR.KZ.

"Рахмоновтар травматология бөліміне бассүйек-мидың жабық жарақаты, мидың шайқалуы деген алдын ала диагнозбен жатқызылды. Жағдайлары орташа. Оларға клиникалық хаттамалар бойынша ем жүргізіліп жатыр", — деді ведомство өкілдері.

Еске сала кетейік, бұған дейін желіде Жамбыл облысында болған жол апатының видеосы тараған еді.

Желідегі жазбада Toyota Land Cruiser 200 жүргізушісі рульге ие бола алмай, жол талғамайтын көлік аударылып қалғаны жазылған.

Апат салдарынан екі адам қаза тауып, жүргізушіні қосқанда екі адам ауруханаға жеткізілді.

Желіде "көлікті белгілі қазақстандық аралас жекпе-жек шебері Шавкат Рахмоновтың әйелі жүргізді" деген ақпарат тарады. Полиция бұл ақпаратты ресми түрде растамады – олар көлікте болғандардың жеке деректерін жариялаған жоқ.

Алайда адам өліміне әкеп соққан жол-көлік оқиғасы бойынша Қылмыстық кодекстің 345-бабы бойынша іс қозғалғаны белгілі. Қазір тергеу амалдары жүргізіліп жатыр.

Осы бапқа сәйкес, көлік құралын, троллейбусты, трамвайды немесе өзге де механикалық көлік құралын басқаратын адамның абайсызда екі немесе одан да көп адамның өліміне әкеп соққан жол қозғалысы немесе көлік құралдарын пайдалану ережелерін бұзғандарға – белгілі бір лауазымдарды атқару немесе белгілі бір қызметпен айналысу құқығынан 7 жылға дейінгі мерзімге айыру, сонымен бірге 5 жылдан 10 жылға дейінгі мерзімге бас бостандығынан айыру жазасы тағайындалады.

Айта кетейік, Шавкат Рахмонов UFC промоушенінде өнер көрсететін қазақстандық аралас жекпе-жек шебері. Қазақстандық 19 рет жеңіс тұғырынан көрінген – "Номад" өз мансабында ешқашан жеңіліп көрмеген.

Sport.kz сайтының хабарлауынша, Рахмоновтардың төрт баласы бар – үш қыз және бір ұл. Кенже қызы өткен жылдың сәуір айында дүниеге келген.

Мәтіннен қате тапсаңыз, бізге жазыңыз