24-25 шілде күндері Жамбыл және Алматы облыстарындағы республикалық маңызы бар автожолдардағы жол апатынын 10 адам қаза тауып, 4 адам түрлі дәрежедегі жарақат алған. Осы орайда "ҚазАвтоЖол" ұлттық компаниясы көлік жүргізушілеріне үндеу жасап, жол қозғалысы ережелерін қатаң сақтауға шақырды, деп хабарлайды KAZ.NUR.KZ.

"ҚазАвтоЖолдың" мәліметінше, 2025 жылғы 24 шілдеде сағат 09:40-та "Астана – Қарағанды – Алматы" автожолының 451 шақырымында (Жамбыл облысы, Мойынқұм ауданы, Қашқантеңіз станциясына жақын жерде) жол апаты болған.

Алдын ала мәліметтерге сәйкес, Toyota Alphard көлігінің жүргізушісі жылдамдық режимі мен қауіпсіз арақашықтықты сақтамай, жүк тиегіш экскаватормен соқтығысқан. Оқиға салдарынан төрт адам қаза тауып, екі адам жарақат алған.

2025 жылғы 25 шілдеде сағат 10:15-те республикалық маңызы бар KAZ-06 автожолының 81+500 шақырымында (Алматы облысы, Жамбыл ауданы Самсы ауылының маңы) Toyota Alphard көлігі мен трактор соқтығысқан.

Оқиға болған сәтте жолдың аталған учаскесінде жөндеу жұмыстары жүргізіліп жатқан. Жұмыстар тиісті рұқсатнама негізінде жүзеге асырылып, барлық қажетті уақытша жол белгілері қойылған. Жөндеу нысанында 9 қызметкер және 5 техника бірлігі жұмыс істеген.

Алдын ала мәліметтер бойынша, Toyota Alphard жүргізушісі жоғары жылдамдықпен келе жатып, жүк көлігін оң жақ жолақ арқылы басып озуға тырысқан. Салдарынан ол қоршалған жөндеу аймағына шығып кетіп, арнайы техникамен соқтығысқан.

Апат салдарынан 6 адам, оның ішінде бір жол қызметкері қаза тауып, тағы екі адам жарақат алған.

"ҚазАвтоЖол" ұлттық компаниясы қаза тапқандардың отбасыларына қайғыра көңіл айтады.

Жол қозғалысына қатысушы барлық жанды жол қозғалысы ережесін сақтауды және жолда мұқият болуды сұраймыз", — делінген хабарламада.

Айта кетелік, бұған дейін Бас прокуратура еліміздегі жол-көлік оқиғаларының артуына байланысты дабыл қаққан еді.

Бас прокуратураның Құқықтық статистика және арнайы есепке алу жөніндегі комитетінің мәліметі бойынша, 2025 жылдың 6 айында елімізде 15 698 жол-көлік оқиғасы тіркелген, бұл өткен жылдың сәйкес кезеңімен салыстырғанда 54 пайызға артық.

Мәтіннен қате тапсаңыз, бізге жазыңыз