Жетісуда фельдшерлер түнде шырт ұйқыда жатқан екі балалы отбасын өрттен құтқарды. Олар үйдің жанып жатқанын кезекті шақыртулардың бірінен қайтып бара жатқанда байқап қалған, деп хабарлайды KAZ.NUR.KZ Денсаулық сақтау министрлігінің баспасөз қызметіне сілтеме жасап.

Министрліктің мәліметінше, Ескелді ауданының №6/6 жедел жәрдем бригадасы шақыртудан қайтып келе жатқан жолда жанып жатқан үйді байқаған.

"Фельдшерлер Ғабит Ерғажы, Дамира Рахимова және жүргізуші Мұрат Сәтеков бірден іс-қимылға көшті: олар тоқтап, сирена мен жарық сигналын қосты. Үй жабық болды. Бірақ бригада оған қарамастан терезелер мен есікті қағып, ұйықтап жатқан тұрғындарды оятып, барлығына далаға шығуға көмектесті", — делінген хабарламада.

Үйде бес ересек адам мен екі бала, оның ішінде омыраудағы бала болған. Олар құжаттарын ғана алып үлгеріп, жалын құшқан үйден қашып шыққан.

Министрліктің баспасөз қызметі өкілдерінің сөзінше, адамдарды құтқарғаннан кейін бірнеше минуттан кейін үй толығымен өртеніп кеткен.

Мәтіннен қате тапсаңыз, бізге жазыңыз