Әл-Фараби атындағы ҚазҰУ базасында жерүсті спутниктік станциясы салынады. Бұл туралы Ғылым және жоғары білім министрлігіне сілтеме жасаған KAZ.NUR.KZ хабарлайды.

Министрліктің мәліметінше, жерүсті спутниктік станциясы Хайнань спутниктік деректер орталығы және Қытайдың Солтүстік-батыс политехникалық университетімен бірлесіп салынады.

Хайнань провинциясының Қытай халық саяси кеңесінің комитеті (ҚХСКК) делегациясымен өткен кездесуде спутниктік жерүсті станциясын салу және оның орнын таңдау туралы хаттама-келісімге қол қойылған.

"Өткен жылы әл-Фараби атындағы Қазақ ұлттық университеті мен Қытай Халық Республикасының Солтүстік-батыс политехникалық университеті микроспутник арқылы ғылыми зерттеулер жүргізу бойынша келісімге қол қойды.

Аталған келісімге мемлекет басшысы Қасым-Жомарт Тоқаев пен Қазақстанға ресми сапармен келген ҚХР төрағасы Си Цзиньпиннің бірлескен мәлімдемесінде қол жеткізілген болатын.

Қазіргі уақытта біздің ғалымдар СБПУ-дағы әріптестермен бірлесіп келесі буындағы – Қазақстан мен Орталық Азиядағы алғашқы университеттік микроспутник болып табылатын NKSAT жобасын әзірлеуде", — дейді ҚазҰУ-дың басқарма мүшесі – ғылыми-инновациялық қызмет жөніндегі проректор Марғұлан Ибраимов.

Жобаның жалпы құны 3 миллион АҚШ долларын құрайды.

"Бұл станция Х-диапазонда жұмыс істеп, біздің спутниктермен қатар, басқа елдердің спутниктерінен де сигнал қабылдап, өңдеуге мүмкіндік береді", — делінген хабарламада.

Мәтіннен қате тапсаңыз, бізге жазыңыз