2025 жылғы 25 шілдеде ОКҚ өткен брифингте ҚР Еңбек және халықты әлеуметтік қорғау министрлігі Мемлекеттік еңбек инспекциясы жөніндегі комитеті төрағасының орынбасары Ерболат Әбілхатин қай өңірдің жұмыс берушілері жұмыскерлерге жалақыны уақтылы төлемейтінін айтты.

Ерболат Әбілхатин Қазақстанда еңбек тәуекелдерінің картасы жұмыс істейтінін хабарлады. Ал тәуекелдердің бірі – жалақы мен зейнетақы жарналары бойынша берешек.

"Бүгінде республика бойынша қарыз 873 млн теңгені құрайды. Қарыздың ең көп өсімі Алматы, Атырау және Жамбыл облыстарында байқалады", – деді ол.

Бұл жағдай, оның айтуынша, кейде объективті себептерге байланысты туындайды. Мысалы, қосалқы мердігерлермен жұмыс істейтін өнімді жеткізушілер жалақыны жұмысшыларға уақытында тікелей аудармаса.

"Өндіріп алудың нұсқалары бар – бұл сотқа жүгіну. Кәсіпорындардың үш айдан астам берешегі болса, мемлекеттік еңбек инспекторлары істі жеке сот орындаушылары арқылы мәжбүрлеп өндіріп алуға береді", – деді спикер.

2025 жылдың 11 шілдесінде жалақы бойынша берешегі және еңбек құқықтарының бұзылуы анықталған кәсіпорын басшыларына 1951 міндетті ұйғарым шығарылғаны хабарланды. Сондай-ақ жалпы сомасы 233 миллион теңгеден астам айыппұл салынды.