Сауд Арабиясында "Ұйқыдағы ханзада" ретінде танылған, 20 жыл комада жатқан ханзада Әл-Валид ибн Халед ибн Талал Әл Сауд қайтыс болды, — деп хабарлайды Massaget.kz тілшісі NEWSru.co.il-ға сілтеме жасап.

Бұл туралы оның әкесі, ханзада Халед ибн Талал ибн Абдулазиз әлеуметтік желі X парақшасында мәлімдеді. Ханзада 36 жаста болған.

Ол 2005 жылы Лондонда оқып жүрген кезінде жол апатына ұшырап, миына қан құйылған. Ол кезде ханзада небәрі 16 жаста еді. Содан бері кома жағдайында болған ханзада Эр-Риядтағы патша Абдулазиз атындағы медициналық орталықта өкпені жасанды желдету аппаратына қосылып, дәрігерлердің тұрақты бақылауында жатқан.

Оның әкесі ханзада Халед, ұлын өмірді қолдайтын аппараттан ажыратуға қарсы болған. Оның емделуіне жылдар бойы АҚШ пен Испаниядан келген шетелдік дәрігерлер де атсалысқан. Алайда барлық медициналық көмекке қарамастан, ханзада есін жия алмады.

Өзекті жаңалықтарды өз уақытында оқу үшін Facebook парақшамызға жазылыңыз!