Ол бүгінгі сотқа тәуелсіз сарапшы ретінде келді.

Еске салайық, Т.Халимназаров экс-министр Қуандық Бишімбаевтың сотынан соң елге кеңінен танылған еді, деп хабарлайды inbusiness.kz сайты.

Сотқа мемлекеттік айыптаушылар сотталушылардың кінәсін дәлелдеу үшін сараптама жасаған мемлекеттік сарапшыны шақырған еді. Одан кейін адвокат Мейірман Шекеев сотқа өзінің өтінішін түсірді.

– Жәбірленушілердің сол кездегі адвокаттары да өтінішхат түсіріп, сарапшы Т.Халимназаров қосымша сараптама жасаған. Сол кісінің де келуін қамтамасыз еттік. Мемлекеттік сарапшыдан кейін ол кісіден де жауап алсақ, – деді адвокат.

Сот оның өтінішхатын қанағаттандырды.

Тахир Халимназаров сотта жасаған зерттеуін былайша айтып берді.

– Өлім себебі мәйітті зерттеген кезде-ақ анықталған. Ол тек ғана кеуде қуысының кесілген жарақаты арқылы көп мөлшерде қан кеткеннен қайтыс болған. Қалған анықталған қанталаулар, сызаттар олар – сараптама әдістері бойынша сыртқы жарақаттар. Олар өлімге емес, денсаулыққа ауырсыну тудырады, – деді ол.

Содан соң адвокаттардың "Шерзатты аман алып қалуға болар ма еді?" деген сұрағына да жауап қатты.

– Жарақат алғаннан кейін 1 литрге дейін қан жоғалтпаса, мүмкіншілік болады. Бірақ, қан аға бергеннен кейін жағдай қиындайды. Мәйіттің (Шерзат Полаттың) ішінен 1,5 милилитр қан таптық. Бұл – оның кеуде қуысында қалған қан. Сыртқа аққан қан қосылады да, бұл міндетті түрде көбейеді, – деді ол.

Осыған дейін сарапшы Мұхит Оразбекұлы Шерзат Полаттың өліміне тікелей әсер еткен жарақатты айтқан еді.