Астанада өрттен зардап шеккендерге көмек штабы ашылды.

Бұл туралы қалалық әкімдік хабарлады, деп жазады inbusiness.kz сайты.

Арнайы штабта төтенше жағдайлар департаментінің, полиция департаментінің, әкімдіктің, инвестициялар және кәсіпкерлікті дамыту басқармасының өкілдері, банк қызметкерлері, салық органдары және базар әкімшілігі кезекшілік етеді.

Штаб аясында "Биг Шанхай" базарының зардап шеккен жалға алушылары, кәсіпкерлері және жұмысшылары бизнесін қалпына келтіру, жалдау, салықтық және банктік міндеттемелер бойынша кеңес ала алады.

Қазіргі уақытта салық төлемдері мен банктік міндеттемелер бойынша кейінге шегеру мәселесі қарастырылып жатыр. Сауда орны зардап шеккен кәсіпкерлердің тізімі банктер мен қаржы ұйымдарына жіберіліп, қолдау шараларын ары қарай қарау жоспарланып отыр.

Базар әкімшілігінің айтуынша, алдағы бірнеше күн ішінде зардап шеккен барлық кәсіпкерге баламалы сауда орындарын ұсыну мәселесі шешіледі.

– Штаб Астана қаласындағы "Anuar" супермаркетінің 3-қабатында, Алаш тасжолы, 30а мекенжайында орналасқан. Ақпарат және кеңес алу үшін колл-орталық жұмыс істейді. "Биг Шанхай" базарының әкімшісі:+7 778 141 83 13, – деп жазылған ресми хабарламада.

Бүгін түннен бастап Астанадағы Байқоңыр ауданында орналасқан "Биг Шанхай" базарының үш қабатты ғимаратында болған ірі өртпен төтенше жағдайлар департаментінің қызметкерлері күресіп жатыр.

Өрт таңғы 07:10-да оқшауланғанымен, сөндіру жұмысы әлі де жалғасып жатыр.