18 шілдеге қараған түні қазақтың көрнекті ақыны, драматург және композиторы Исраил Сапарбай Қаскелеңдегі үйінде қайтыс болды, деп хабарлайды Zakon.kz.

Әдебиеттің ұлы майталманының қайтыс болғаны туралы хабарды Жазушылар одағы төрағасының орынбасары Қасымхан Бегманов Facebook желісіндегі парақшасында жариялады. Оның өліміне ауыр сырқат себеп болған.

"Бүгін таңнан суық хабар жетті.. Таңғы сағат төрт шамасында 85 жасына қараған шағында Қазақстанның халық жазушысы, Тәуелсіз "Платиналы Тарлан" сыйлығының лауреаты, аса көрнекті ұлт ақыны, белгілі драматург, талантты сазгер Исраил Сапарбай ағамыз дүниеден өтті. Иә, сағат тілі қасиетті жұмаға қарай ауғанда ақынның соңғы демі үзілді." Қасымхан Бегманов

Ұлы ақынның Қаскелеңдегі қара шаңырағында, бала-шағасының алдында ауыр науқастан қайтқаны жайлы хабарды Қасымхан Бегмановқа ұлы Нұрлан Исраилұлы хабарлаған.

"Биыл қазақ әдебиетінің алыптары, кезінде інілері болып соңынан ерген асыл ағаларым – Дулат Исабеков (20.12.1942 – 21.02.2025), Темірхан Медетбек (06.05.1945 – 10.05.2025), енді міне, Исраил Сапарбай (15.05.1941 – 18.07.2025) бірінен соң бірі өмірден өткені менің жаныма қатты батып, жүрегім ауырып отыр. Алапат қайғы санама енді ғана жеткендей күй кешіп отырмын. Сол Кеңсайға, алыптардың қасына енді Исраил ағам да кетіп бара жатыр. Қазақстан Жазушылар одағының Төрағасымен бірге ағамыз қатты ауырып жатқанда, ауруханаға барып, үнемі хабар алып тұрдық. Соңғы барғанымызда күбірлеп, ақырын өз өлеңін оқып жатты..." Қасымхан Бегманов

Аса көрнекті лирик ақын Исраил Сапарбайдың артында қаншама әндері, лағылдай, мөлдіреген жақұттай поэзиясы, мәңгі өлмес сырлы, мұңлы жырлары қалды. Жазған пьесалары М.Әуезов театрынан бастап еліміздің бірнеше театрларында сахналанып, отты жырлары өз оқырмандарын тауып, әсем әндері миллиондардың жүрегіне жетіп, қазақ аспанында қалықтап тұр, – деп жазды Қасымхан Бегманов.

"Жаныңыз жәннатта болсын, асыл аға, жан аға, Исраил көкем менің...Ағамыздың қонақасы, жаназасы, асы қайда өтетіні жайлы қосымша хабарлайтын боламыз." Қасымхан Бегманов

Исраил Сапарбай – 1941 жылы 15 мамырда Өзбек КСР-нің Самарқанд облысындағы Кушрабад ауданында туған.

Шымкент педагогика институтының тіл-әдебиет факультетін бітірген соң, бірнеше жыл Шымкент облыстық "Оңтүстік Қазақстан" газетінде жұмыс істеген. 1973–1975 жж. Алматы Жоғары партия мектебін бітірді. 1976–1983 жж. Қазақстан Жазушылар одағының Шымкент облысаралық бөлімшесінде әдеби кеңесші қызметін атқарып, 1983 жылы "Жалын" баспасына аға редакторлыққа ауысқан. 1984 – 1985 жж. "Қазақ әдебиеті" газетінде поэзия бөлімінің меңгерушісі, 1985–1992 жж. "Жазушы" баспасында поэзия бөлімінің меңгерушісі, одан соң "Қазақфильм" телестудиясы бас редакторының орынбасары, 1997–1998 жж. Сыртқы істер министрлігінің ТМД елдері бойынша Департаментінің І хатшысы, 1998–1999 жж. Өзбекстан Республикасындағы Қазақстан елшілігінде ІІ хатшы қызметтерін атқарды. Алғаш бір топ өлеңдері 1975 жылы "Көктем тынысы" ұжымдық жинағында жарық көрді. Республикалық "Жалын" бәйгесінің жүлдегері. 70-ке тарта әндер мен 150-ге тарта ән мәтіндерінің авторы. "Ауылдан келген ару", "Әмір-Темір", Абай-Тоғжан", "Сыған серенадасы", "Махаббат мейрамы" пьесалары театр сахнасында қойылып жүр.

Түркі поэзиясы халықаралық фестивалінің, Қазақстан Жазушылар одағының І.Жансүгіров атындағы сыйлығының, Тәуелсіз "Платиналы Тарлан" сыйлығының лауреаты.

Шығармалары: Аққу арман. А., "Жалын", 1976; Раушан ғұмыр", А., "Жалын", 1978; Бозқараған. А., "Жалын", 1980; Қызыл-жасыл дүние. А., "Жалын", 1984; Жүрегіме ұя салған қарлығаш. Өлеңдер. А., "Жалын", 1986; Қызыл жел. Өлеңдер. А., "Жалын", 1998; Ғашықтың тілі. Өлеңдер, А.; Бармақтай бақ. Өлеңдер. А., "Рауан"; Махаббат пен Ғадауат. Өлеңдер. А., "Атамұра"; Тар төсекте төсіңді. А., "Дала".