ҚР Парламенті Мәжілісінің депутаты Дәулет Төлеутайұлы жігітіне несие алып беретін қыздарға ақыл айтты, деп хабарлайды Skifnews.kz ақпарат порталы.

Депутат қоғамда қыздарды алдап, несие алдырып, оны төлемей кететін жігіттердің көбейгенін айтты.

«Көп адам дайректке хат жазды. Әсіресе, қыздар, қарындастарым, қалай өзің жүріп жүрген жігітіңе кредит алып бересің? Қай басыңмен, қалай ойлануға болады? Ешкімге, ешқандай кредит алып бермеңіздер. Мынандай хаттар өте көп келді: жігітімен жүріп жүреді, 2 миллион, 5 миллион алдыртады, сосын жоқ болып кетеді. Қазір өкінішке орай, ондай азаматтар да көбейіп кеткен. Қоғамда оларды альфонс дейді ме, білмеймін. Бірақ, өте сақ болыңдар. Одан кейін махаббат болып, мен сені аламын деген сөздерге де алданып қалатын қыздар да өте көп екен. Сондықтан, мүлде ешкімге несие алмаңдар. Үйленіп, той болып жатқан кезде жігіт жақ қызға миллиондап несие алдыртып, кейін ажырасып кететін жағдайлар да болады екен. Несие қыздың басында қалады. Хаттарды оқып, шошисың. Үлкен құлаққағыс», — дейді депутат.

Сондай-ақ, депутат нағыз жігіттің қыздан ақша сұрамайтынын да тілге тиек етті.

«Қыздар, қарындастарым! Махаббатқа масайып, бастарың айналып, жігітке кредит алуды қойыңдар. Сүйем-күйем деп жүріп, күйдіріп кеткендер қаншама?! Жігітің жақын туысың да емес қой? Жекеме келген хаттар жаға ұстатарлық. Ойланайық! Нағыз еркек қыздан ақша сұрамайды. Еркек ақша табады», — деп жазды ол.

Депутаттың қыздарға жасаған бұл ескертуі желіде қызу талқылануда. Жазылған пікірлерден бұл мәселенің қоғамда кең тарағанын байқауға болады.

«Мен үшін алып бере алмайсың ба не, мені сүймейсің ба не, мен кіммін сонда саған, демек маған сенбейсің ғой я деген манипуляцияға түсіп қалмаңдар. Олар еркек емес, еркекпін деген адам ақша сұрамайды!», «Мен солай алданып 3 миллион алып бердім, қазір өзім төлеп жүрмін», «Қазір жігітің түгілі күйеуіңе алып беруге болмайды», «Жігттер ғана емес, қыздар да алдыратын болған. Студент балам жүрген қызына кредит алып берген. Қазір біз төлеп жатырмыз. Студенттерге кредит берілмейтін заң шығару керек», — деп жазды олар.