Басты мәселе – үйді сүруге құлықсыз шенеуніктерде – деді тұрғындар.

Астанада жүздеген тұрғын құлағалы тұрған үйдің үйіндісінің астында қаламыз ба деп үрейленеді, деп хабарлады 31 арнаның Информбюро ақпараттық бағдарламасы.

Айтуларынша, нысан шұғыл сүрілуге тиіс. Болмаса, жыл өтпей қирауы әбден мүмкін. Сондықтан, тозығы жеткен ғимаратты апатты деп тануды талап етеді. Құзырлы орган өкілдері де нысанның апатты жағдайда тұрғанын растап отыр. Бұл – аз күнде үйлері үйіндіге айнала ма деп қауіптенген бұқараның базынасы. Тезі қатты тұрғындар қабырғасы қақырап, кірпіші үгітілген үйді шұғыл сүріп тастауды талап етеді. Өйткені көп қабатты тұрғын үйді жөндеу де, мекендеу де мүмкін емес.

Қазір орындалмайтын уәде мен жетіп болмайтын жәрдемнен шаршаған ел ескі үйлерінің орнына, жаңасын салып беруді сұрап отыр. Бірақ, басты мәселе – үйді сүруге құлықсыз шенеуніктерде – деді тұрғындар.

Ал әкімдік өкілдері өткен жылы апатты үй халқымен кездесіп, күрделі жөндеу жұмыстарын жасауды ұсынған. Алайда, тұрғындар бас тартқан.

"ӨРКЕН ҚАЛА" ЖШС басшысының орынбасарыНұрлыбай Хамиұлы нысанды сүру – құзырымызға кірмейді деп отыр. Бірақ сараптамадан өткізіп, техникалық қорытынды шығарып берген.

Айтуынша, халық үйді жаңартуға келіссе, жөндеу жұмыстарын бастауға дайын. Алайда, тұрғындар апатты үйдің сүрілгенін қалайды. Соған қарағанда, бұл мәселе тараптар бір байламға келмейінше, шешілмейтін секілді.