Ақ үй басшысы сүйінші жаңалықты әлеуметтік желідегі парақшасында хабарлады.

АҚШ пен Индонезия сауда келісіміне келді. Бұл туралы Ақ үй басшысы Дональд Трамп жазды, деп хабарлайды inbusiness.kz сайты Интерфакс агенттігіне сілтеме жасап.

Бұған дейін АҚШ-тың Вьетнам және Қытаймен сайда келісімдеріне қол қойғаны туралы ақпарат шыққан болатын.

Сауда келісімі аясында Индонезияға салынатын кедендік баж салығы 19 пайыз болып белгіленді. Ал АҚШ-тың тауарлары Индонезияға кеден салығынсыз экспортталмақ.

"Бүгін таңертең Индонезияның құрметті президенті Прабово Субиантомен болған әңгімеден кейін маңызды келісім жасастым", – деп жазды Трамп Truth Social желісінде.

Құжатқа сәйкес, Оңтүстік-Шығыс Азия елі АҚШ-тан 15 млрд доллар тұратын энергия тасымалдаушыларын, 4,5 млрд доллардың ауыл шаруашылығы өнімдерін, Boeing-тың 50 ұшағын сатып алуы тиіс.

Дональд Трамп америкалық тауарлардың Индонезияға емін-еркін жеткізілетінін атап өтті. Оның айтуынша, бұл келісім аясында АҚШ үшін Индонезия нарығы ашылады.

Айта кету керек, бұған дейін Трамп Қазақстан тауарларына 25% баж салығын енгізетінін жазған едік. Премьер-министр Олжас Бектенов Дональд Трамптың хатына байланысты пікір білдірді.