Шығыс Қазақстан облысында "Өскемен әуежайы" компаниясының басшылығына қатысты тергеу аяқталды. Бұл туралы Қаржы мониторингі агенттігінің ресми өкілдері мәлімдеді, деп хабарлайды KAZ.NUR.KZ.

Қаржы мониторингі агенттігінің ШҚО бойынша департаменті Бас көлік прокуратурасының үйлестіруімен "Өскемен әуежайы" басшылығына қатысты қызметтік өкілеттіктерін асыра пайдалану, аса ірі көлемде сеніп тапсырылған мүлікті иемдену және қылмыстық жолмен алынған қаражатты заңдастыру фактілері бойынша тергеуді аяқтады.

Құзырлы орган мәліметінше, 5 жыл бойы акционерлік қоғамның бұрынғы президенті мен өзге де лауазымды тұлғалары еңбекақыны негізсіз көбейту, жалған сыйақылар мен жалған шарттар жасау арқылы жүйелі түрде ақша жымқырған.

Ведомство өкілінің сөзінше, жымқырылған қаражат кейін касса арқылы қолма-қол ақшаға айналдырылған. Қоғамға тиесілі көлік құралдары бухгалтерлік есептен шығарылып, нарықтағы құнынан бірнеше есе төмен бағамен сенімді тұлғаларға сатылған.

Сонымен қатар ведомстводағылар акционерлік қоғамның коммерциялық нысандары жеңілдетілген шарттармен жалға берілгенін анықтағанын айтады: яғни, жалдау ақысы төмендетіліп, нақты жалға берілген аумақ азайтылып көрсетілген.

Мемлекетке келтірілген жалпы залал 157 млн теңгені құраған.

"Сот санкциясымен күдіктілердің 126 млн теңге көлеміндегі мүлкіне (4 пәтер, жер учаскесі және 2 автокөлік) тыйым салынды. Күдіктілер қамауға алынды", — делінген хабарламада.

ҚМА өкілдері Қылмыстық-процесстік кодекстің 201-бабына сілтеме жасап, өзге ақпарат жария етілмейтінін хабарлады.

Мәтіннен қате тапсаңыз, бізге жазыңыз