Есет батыр тұрғын алабындағы 5 қабатты екі үйдің бірі ғана мемлекеттік мекеме балансына өткен.

Екінші үйде пәтер иесі жылжымайтын мүлкін банкке кепілге қойып, оны босату жұмысы әлі жалғасып жатыр, деп хабарлайды inbusiness.kz сайты.

Ақтөбе қаласы әкімі баспасөз қызметі Алматы ауданы, Есет батыр тұрғын алабындағы № 39 "К", № 40 "К" үйлері екі жылдан бері бос тұрғанын хабарлайды. "Нұрлы жер" бағдарламасымен үй салған құрылыс компаниясының басшылары мен техникалық бақылаушылар өткен жылы 5 және 6 жылға сотталып кеткен.

Сот үкімі заңды күшіне енгеннен кейін Ақтөбе қалалық құрылыс бөлімі екі үйді де тұрғын үй қатынастары бөлімінің балансына өткізуі тиіс.

– Тұрғындардың пәтері банкте, өзге де қаржы институттарында кепілде болды. Әр пәтердің құжатын тексеріп, кепілден толық босату оңайға соқпады. Жақында ғана екі үйдің бірінің құжаты толық рәсімделіп, үй қалалық тұрғын үй қатынастары бөлімінің балансына өтті. Енді қалалық тұрғын үй қатынастары бөлімі экономика және қаржы бөліміне хат дайындайды. Қалалық экономика және қаржы бөлімі өкім шығарып, үйді құрылыс бөлімінің балансына береді. Содан соң сүру туралы құжат дайындалады. Ал екінші үйдегі бір пәтер банкке кепілге қойылған. Қазір заңгерлер жұмыс істеп жатыр, – деп мәлімдеді Ақтөбе қаласы әкімінің баспасөз қызметі.