Турнир 13 дисциплина бойынша ұйымдастырылады.

2026 жылы 18 шілде мен 1 тамыз аралығында Астанада фиджитал-спорттан "Болашақ ойындары" халықаралық мультиспорттық турнирі өтеді. Жарысқа жүзден астам мемлекеттен 1500-ге жуық спортшы қатысады. Бұл туралы Туризм және спорт вице-министрі Серік Жарасбаев Орталық коммуникациялар қызметі алаңында өткен баспаөз конференциясында хабарлады.

Турнир 13 дисциплина бойынша ұйымдастырылады. Ойындарға елорданың барлық ірі спорт нысаны тартылмақ. Жарыс Qazaqstan жеңіл атлетикалық спорт кешені, "Барыс Арена" мұз айдыны, "Сарыарқа" велотрегі, Жақсылық Үшкемпіров атындағы жекпе-жек сарайы, "Алау" мұз сарайы, "Билайн Арена", инклюзивті спорт орталығы, Конгресс-орталық секілді жетекші стадиондарда өтеді.

"Бүгінгі таңда турнирдің дисциплиналары анықталды: Phygital Football, Phygital Fighting, Phygital Basketball, Phygital Dancing, Phygital Hockey, Phygital Shooter, Phygital Battle Royale, MOBA 1 және MOBA 2, Phygital drone Racing. Турнирде ұсынылатын барлық дисциплиналар спорт, техника, тактика, батл секілді санаттарға бөлінеді", – деді Серік Жарасбаев.

Оқи отырыңыз: 2026 жылы жазда Астанада Games of the Future турнирі өтеді

Оның айтуынша, ойындар шеңберінде робототехника, виртуалды және толықтырылған шындық, спорт және білім беру саласындағы жетістіктердің интерактивті көрмесі – "Болашақ қаласы" арнайы жобасын іске асыру жоспарланған.

"Ойынды ұйымдастыруға өтініш білдірген елдердің арасынан Қазақстанды іріктеп алдық. Халықаралық турнир Астанадай әдемі қалада өтетініне қуаныштымын. Келер жылы "Болашақ ойындарына" бүкіл әлем көз тігеді. Бұл – физикалық және цифрлық ойындардың қосындысы. Ойыншылар бір-бірімен виртуалды түрде жарысып, тәжірибе жинап, қомақты жүлдеге таласады. Фиджитал-спорт кейінгі жылдары жылдам дамып жатыр. Бір жыл бұрын жүз ғана қатысушы болса, қазір екі мыңнан асты. Спорт болашағы деп айтсақ артық емес", – деді Phygital International ұйымның бас директоры Нис Хатт.

Оқи отырыңыз: 2026 жылы "Болашақ ойындары" Қазақстанда өтеді: Биылғы 1 тамызда іріктеу турнирлері басталады

2026 жылғы қаңтар айында турнирге алты ай қалғанда БАҚ-ты аккредиттеу басталады. Шараға көптеген шетелдік баспасөз өкілдері қатысады деп күтіледі.

Мұндай турнир алғаш рет 2024 жылдың ақпан айында Ресейдің Қазан қаласында ұйымдастырылды. Биыл "Болашақ ойындары" желтоқсан айында Абу-Дабиде өтеді.