Жаңа ғимарат қауіпсіздік пен қамқорлықтың символына айналды .

Қонаев қаласында жаңа заманауи балалар үйінің құрылысы аяқталды. Алматыдағы апатты ғимараттан көшірілген 171 тәрбиеленушіге жаңа, қауіпсіз баспанаға айналды, деп хабарлайды Caravan.kz медиа порталы.

Жобаның құны – 4 миллиард теңге. Қаржы толығымен жеке инвестор есебінен бөлінген.

1963 жылы салынған Алматыдағы бұрынғы балалар үйінің апатты жағдайы тәрбиеленушілерді көшіруге басты себеп болды. 2024 жылы жүргізілген техникалық тексеру нәтижесінде ғимараттың пайдалануға мүлде жарамсыз екені анықталды. Сарапшылар жүк көтеруші құрылымдардағы қауіпті жарықтарды, инженерлік жүйелердің әбден тозғанын және сейсмикалық талаптарға сай келмейтінін анықтады. Ғимаратты жөндеу құны 1,8 миллиард теңгеге бағаланды, алайда бұл шешім экономикалық тұрғыдан тиімсіз деп танылды.

“Балалардың өмірі мен қауіпсіздігі туралы сөз болып отыр, қателессек зардабы тым ауыр болады. Нәтижесінде балаларды жаңа, қауіпсіз әрі жайлы ортаға көшіру туралы ұтымды шешім қабылданды», – деді Білім басқармасы басшысының орынбасары Ақмарал Атенбекова.

Жаңа балалар үйі барлық заманауи талаптарға сай салынған. Мұнда бөлек асханалар, оқу және ойын бөлмелері, психолог кабинеттері, спорт және акт залдары бар. Кең әрі жарық бөлмелер орналасқан, балалар өздерін үйдегідей еркін сезіне алады.

Көшіру кезең-кезеңмен жүзеге асады. Алғашқылар қатарында мектепке дейінгі және бастауыш сынып жасындағы 61 бала көшіріледі. Толық көшіру тамыз айының соңына дейін аяқталады. Ал Алматыдағы ескі ғимарат коммуналдық меншікке беріледі.

Инвестор бұнымен тоқтап қалмайтынын мәлімдеді. Енбекшіқазақ ауданында балалар шығармашылығы орталығының құрылысы басталатыны белгілі болды. Аталмыш жаңа орталық өңірдегі балалар мен жасөспірімдерге даму мен өзін-өзі танытуға кең мүмкіндік ұсынбақ.