Тақырып тікелей әлеуметтік осал топ және төтенше жағдайдан зардап шеккендер туралы болып отыр.

Мұндай жаңашылдықты Қаржы нарығын реттеу және дамыту агенттігі хабарлады, деп жазады inbusiness.kz сайты.

Агенттік осылайша микрокредит беру қағидалары мен банк қарызы шартының талаптарына өзгерістер мен толықтырулар енгізген. Құжат "Ашық НҚА" порталында жарияланды.

– Жоба қаржы нарығын дамыту, қаржы қызметін тұтынушылардың құқығын қорғау, артық заңнамалық регламентті болдырмау мәселелері бойынша өзгерістер мен толықтырулар енгізу туралы заңды іске асыруға әзірленді, – деп жазылған құжатта.

Өзгерістер ең маңызды екі жайтты көздейді. Оның бірі әлеуметтік осал топқа жататын және төтенше жағдайдан зардап шеккен азаматтардың қарызын өтеуін кейінге қалдыруды енгізу болса, екіншісі – растайтын құжаттар болған кезде қарыз алушының, яғни әлеуметтік осал топқа жататын және төтенше жағдайдан зардап шеккен азаматтың табысы төмендеген кезде комиссиясыз кемінде үш айға кейінге қалдыру міндетін белгілеу.

– Өзгерістер мен толықтырулар әлеуметтік осал топқа жататын азаматтармен жалпы қарыз алған жеке тұлғалардың проблемалық берешегін реттеу тетіктерінің тиімділігін арттыруға, сондай-ақ қарыз алушылардың банктік қарыз, микрокредит шартының талаптарына өзгерістер енгізу туралы өтінішті қарау кезінде банк пен микроқаржы ұйымдары қызметінде ашықтық пен біркелкілікті қамтамасыз етуге бағытталған, – деп қоса кетті Қаржы нарығын реттеу және дамыту агенттігі.