Перизат Қайрат пен анасы Ғайни Алашбаеваға қатысты алдын ала сот тыңдалымы өтті. 3 млрд теңгеден астам қаражатты жымқырды деп айыпталған қайырымдылық қорының басшысы Перизат кінәсін мойындамайтынын жеткізіп, көзіне жас алды, деп хабарлайды "КТК" арнасы.

"Маған бірде-бір рет қоғамдық қорғаушы берілген емес. Бүгін өз анамды бірінші рет көріп тұрмын. Заң жүзінде, иә, анама күдікті мәртебесі тек 18 наурызда берілді. Барлығын нақты түсінуіңіз үшін айтайын — менің барлық заңды құқығым бұзылды", — дейді Перизат Қайрат.

Іс ішінара жабық форматта өтеді. Яғни айыптаушыларды сұрау сәтіне журналистер қатыстырылмайды. Алғашқы отырыс 14 шілдеге жоспарланған. Перизат Қайрат тергеу изоляторының қызметкерлері оны ұрғанын айтып, көзіне жас алды.

Бұл туралы қылмыстық іс қозғалған, дейді арна тілшілері.

Дереккөз: "КТК" арнасы

Естеріңізге сала кетейік, 2024 жылғы 14 қарашада қайырымдылық қорының құрылтайшысы Перизат Қайратқа қатысты тергеу жүргізіліп жатқаны белгілі болды.

Қаржылық мониторинг агенттігі ол көктемгі су тасқынынан зардап шеккен азаматтарға көмектесу үшін жиналған 1,5 млрд теңгеден астам қаражатты жымқырды деген күдікке ілінгенін мәлімдеді.

Сол кезде ҚМА өкілдері қайырымдылық үшін жіберілген қаражаттың негізгі бөлігі қымбат сән бұйымдары мен жылжымайтын мүлік сатып алуға жұмсалғанын хабарлаған еді.

Биылғы наурызда Перизат Қайрат басқарған "Biz birgemiz Qazaqstan 2030" қоғамдық бірлестігі мәжбүрлі түрде таратылатыны хабарланды.

9 шілдеде Астанада Перизат Қайрат пен оның анасына қатысты ісі бойынша сот процесі басталды. Перизат Қайрат пен анасына қатысты сот ішінара жабық өтеді.

Мәтіннен қате тапсаңыз, бізге жазыңыз