Желіде Алматы облысында болған оқиғаның видеосы тарады. Онда көлік жүргізушісі көлігін артқа бұрып жатқан кезде велосипедтегі баланы қағып кеткенін көруге болады. Полициядағылар көлік жүргізушісі табылғанын хабарлады, деп жазады KAZ.NUR.KZ.

Оқиға туралы ақпарат бірнеше Telegram-арнада жарияланды. "Твой Алматы" арнасы жариялаған деректерге сай, оқиға 4 шілдеде сағат 20:45-те Алматы облысы Көкөзек ауылында болған.

"Куәгерлердің айтуынша, алкогольге мас күйдегі автокөлік жүргізушісі артқа беріп жатып, баланы қағып кеткен. Кадрлардан ер адам не болғанын тексеру үшін тіпті көліктен түспегенін, оқиға орнынан ізін суытқанын көруге болады. Куәгерлер жүргізуші учаскелік полиция инспекторы екенін айтады", — деп жазды видео авторы.

Оқиға орнынан түсірілген видеоны басқа да дереккөздер жариялаған.

Назар аударыңыз! Видеодағы кадрларды кәмелетке толмаған, сезімтал және аяғы ауыр әйелдерге көруге болмайды!

NUR.KZ тілшісі пікір сұрап, полицияға жүгінді.

"Жедел-іздестіру шаралары барысында 42 жастағы Lexus RX 300 автокөлігінің жүргізушісі ұсталды. Күдікті уақытша ұстау изоляторына қамалды.

Бұл азамат полиция қызметкері емес, ол бұған дейін (жол апатына дейін) жағымсыз уәждер бойынша жұмыстан шығарылған.

Еске салсақ, оқиға салдарынан 6 жасар бала зардап шегіп, ол ауруханаға жатқызылды. Аталған дерек бойынша тергеу шараларының кешені жүзеге асырылып жатыр.

Азаматтардан тек ресми дереккөздердегі тексерілген ақпараттарға сенуді сұраймыз", — делінген Алматы облысы полиция департаменті өкілдері берген жауапта.