Арман Асқарұлы Исетов Қазақстан cыртқы істер министрінің орынбасары қызметіне тағайындалды, деп хабарлайды Ақордаға сілтеме жасаған KAZ.NUR.KZ.

Мемлекет басшысының өкімімен Арман Асқарұлы Исетов Қазақстанның Таиланд Корольдігіндегі Төтенше және өкілетті елшісі лауазымынан босатылып, Қазақстан сыртқы істер министрінің орынбасары лауазымына тағайындалды.

Қазақстан Сыртқы істер министрлігінің ресми Telegram-каналында жарияланған ақпаратқа сәйкес, Исетов 1975 жылғы 17 желтоқсанда Қостанай облысында дүниеге келген. 1998 жылы әл-Фараби атындағы Қазақ ұлттық университетін бітірген.

Өзінің дипломатиялық қызметін 1998 жылы Қазақстан Сыртқы істер министрлігінде Шарт-құқықтық басқармасының референті ретінде бастады. 1999-2004 жылдары Қазақстан СІМ Халықаралық-құқықтық департаментінде түрлі лауазымдарда жұмыс істеді.

2004 жылдан 2008 жылға дейін – Нью-ЙорктегіҚазақстанның БҰҰ жанындағы Тұрақты өкілдігінің бірінші хатшысы, ал 2008-2009 жылдары ҚР СІМ Көпжақты ынтымақтастық департаментінде басқарма бастығы қызметін атқарды.

2009 жылы СІМ Халықаралық-құқықтық департаменті директорының орынбасары болып тағайындалды, ал 2012 жылы осы департаментті басқарды. 2018-2022 жылдары – Нью-Йорк қаласында БҰҰ жанындағы Қазақстан Тұрақты өкілінің бірінші орынбасары.

Қазақстан сыртқы істер министрінің орынбасары болып тағайындалғанға дейін 2022 жылғы сәуірден бастап Таиландтағы Қазақстан елшісі лауазымын атқарды.

І сыныпты Төтенше және Өкілетті Уәкіл дипломатиялық дәрежеге ие.

Ағылшын және түрік тілдерін меңгерген.