Қазақстан Қорғаныс министрлігі әскери қызметшілерге ақшалай қамтылым төлеу туралы бұйрығына өзгерістер енгізіп, оны Конституция мен "Әскери қызмет және әскери қызметшілердің мәртебесі туралы" заңға сәйкестендірді, деп хабарлайды Zakon.kz.
Бұл туралы 2025 жылғы 4 шілдеде Конституциялық соттың баспасөз қызметі хабарлады.
"19 мамырдан бастап ҚР Қорғаныс министрінің 2017 жылғы 2 маусымдағы №255 "Қазақстан Республикасының Қарулы күштері әскери қызметшілеріне ақшалай қамтылым, жәрдемақылар және өзге де төлемдерді төлеу қағидаларын бекіту туралы" бұйрығына енгізілген өзгерістер күшіне енді. Бұл түзетулердің ішінде бұйрықты "Әскери қызмет және әскери қызметшілердің мәртебесі туралы" заңға сәйкестендіруге бағытталған нормалар бар", — делінген хабарламада.
Бұған дейін Конституциялық сот Қорғаныс министрінің бұйрығымен бекітілген ақшалай қамтылым төлеу қағидаларының 26 және 30-тармақтарының кейбір ережелерін Конституцияға қайшы деп таныған болатын.
"Салалық бұйрық заң нормаларына қарамастан, әскери лауазымда емес, бірақ әскери қызмет атқарып жүрген кезеңдерде әскери қызметшілерге ақшалай қамтылым төлемін шектеген. Конституциялық сот мұндай шектеулерді министрлік бұйрығы деңгейінде белгілеу Конституцияға қайшы екенін атап өтті. Конституция еңбек үшін сыйақы алуға құқықты, ең төменгі жалақы мен зейнетақы, әлеуметтік қамсыздандыру кепілдіктерін және құқықтарды тек заңмен шектеу қағидатын бекітеді. Конституцияның 74-бабына сәйкес, Конституцияға қайшы деп танылған заңдар мен өзге де құқықтық актілер, сондай-ақ олардың жекелеген ережелері күшін жояды және қолдануға жатпайды", — делінген Конституциялық сот хабарламасында.
Осыған байланысты Қорғаныс министрлігі бұйрықты қолданыстағы заңға сәйкестендіру үшін қосымша шаралар қабылдады.
