ҚР Үкіметі 2025 жылғы 27 маусымдағы "ҚР шегінен тыс орналасқан және шетелдегі дипломатиялық қызмет органдарына бекітілген мемлекеттік мүлікті иеліктен шығарудың кейбір мәселелері туралы" қаулы қабылдады, деп хабарлайды Zakon.kz.
ҚР Сыртқы істер министрлігін сатушы республикадан тыс орналасқан және шетелдегі дипломатиялық қызмет органдарына бекітілген мемлекеттік мүлікке қатысты айқындады.
Сондай-ақ, ҚР шегінен тыс орналасқан және шетелдегі дипломатиялық қызмет органдарына бекітілген мемлекеттік мүлікті иеліктен шығару ережесі бекітілді.
Қағидалардың күші ҚР халықаралық шарттары негізінде берілген жекешелендіру объектілеріне қолданылмайды.
Жылжымайтын мүлікті иеліктен шығару кезінде сатып алушыға жер учаскесіне құқықтың берілуі оның болу елінің заңнамасына сәйкес жүзеге асырылады.
Сатушының функциялары:
- комиссия құрамын қалыптастыру;
- комиссияның құзыретіне сәйкес мәселелерді оның қарауына шығару;
- комиссия шешімінің негізінде сауда-саттық нысанын айқындау;
- комиссия шешімі негізінде жекешелендіру объектілерінің алғашқы, бастапқы және ең төмен бағасын, кепілдік жарна сомасын айқындау;
- сауда-саттықта жекешелендіру объектісін иеліктен шығару туралы, комиссия шешімі негізінде жекешелендіру объектісін сауда-саттықтан алу туралы шешім қабылдау;
- комиссияның шешімі негізінде әрбір жекешелендіру объектісі бойынша сауда-саттық шарттарын айқындау және өзгерту;
- комиссия ұсынымының шешімі негізінде сатып алу-сату шартының жобасын бекіту;
- сауда-саттықтың өткізілетіні туралы хабарлау (бұдан әрі – хабархат) үшін жекешелендіру объектісі және сауда-саттық туралы ақпаратты айқындау;
- сатып алу-сату шарттарына, сауда-саттық жеңімпаздарымен қабылдау-тапсыру актісіне қол қоюға Қазақстан Республикасының шет елдегі мекемесінің сенімхатын беру;
- сауда-саттықты ұйымдастыру және өткізу барысын бақылауды жүзеге асыру болып табылады.
Қазақстан Республикасының шет елдегі мекемесінің функциялары:
- жекешелендіру объектісі бойынша қажетті материалдарды жинау және сатушыға жекешелендіру объектісін иеліктен шығару туралы ұсыныс жолдау;
- жекешелендіру объектісін иеліктен шығару туралы шешім қабылданғаннан кейін Заңның 100-1-бабына сәйкес жекешелендіру объектісіне бағалау жүргізуді қамтамасыз ету;
- сауда-саттықты дайындау және өткізу;
- сауда-саттыққа қатысушылардың кепілдік жарналарын қабылдау және қайтару;
- тендерге қатысушылардың құжаттарын олардың сауда-саттық шарттарының талаптарына сәйкестігін қарау және оларды тендерге жіберу;
- сауда-саттық жеңімпазын жариялау;
- сатушының сенімхаты негізінде сатып алушылармен (жеңімпаздармен) сатып алу-сату шарттарын жасасу және олардың орындалуын бақылау;
- сауда-саттықта сатылған жекешелендіру объектілерін сатушының сенімхаты негізінде осы Қағидалардың 55-тармағында айқындалған тәртіппен қабылдау-беру актісі бойынша сатып алушыларға беру;
- сатушыны сауда-саттықты дайындау мен өткізудің барлық кезеңдері туралы хабардар ету болып табылады.
Егер сатып алушы:
- болу еліндегі Қазақстан Республикасының шет елдегі мекемесінің немесе сатушының персоналы;
- болу елінің заңнамасына сәйкес иеліктен шығарылатын жекешелендіру объектісін сатып алуды жүзеге асыруға құқығы жоқ жеке немесе заңды тұлға болса, жекешелендіру объектісін сатып алушыға (иеленушіге) иеліктен шығару жүзеге асырылмайды.
Сонымен қатар, ереже комиссияның ұйымдастырылуы мен қызметінің тәртібін, сауда-саттықты, тендерлерді және т. б. дайындау мен өткізуді белгілейді.
Қаулы 2025 жылғы 13 шілдеден бастап қолданысқа енгізіледі.
