2026 жылдан бастап мемлекеттің шығыстарын қысқартып, кейбір министрліктерді біріктіру қажет. Бұл туралы мәжіліс депутаты Бақытжан Базарбек айтты, деп хабарлайды "ҚазАқпарат" ХАА.

"Мемлекеттік қызметтерді цифрландыру аясында 2026 жылдан бастап мемлекеттік аппаратты біртіндеп қысқартуымыз қажет. Одан барлығы қорқады. 2026 жылдан бастап мемлекеттің шығыстарын қысқартпасақ, онда қарызымыз қыса бастайды. Сондықтан "Самұрық-Қазына" ҰӘҚ, "Бәйтерек" компаниясының әкімшілік аппаратын қысқартуымыз керек. Министрліктерді де дереу қысқартуымыз қажет, — деді Бақытжан Базарбек парламент палаталарының бірлескен отырысы аясында БАҚ өкілдеріне берген сұқбатында.

Оның айтуынша, 2-3 министрлікті біріктіруге болады.

"Халық саны аз Қазақстанға осыншама министрлік қажет емес. Мысалы, Су министрлігі мен Экология министрлігін, Қаржы министрлігі мен Ұлттық экономика министрлігін, Өнеркәсіп министрлігі мен Көлік министрлігін біріктіре салуға болады.

Әр министрдің 5-6 орынбасары бар. 4-еуін қысқартып, екі орынбасар ғана қалдыру қажет. Басқаша айтқанда шығындарды азайтуымыз керек. Яғни, оны қысқартып, жасанды интеллект, цифрландыруға айналдыруымыз қажет. Басқаша айтқанда 2030 жылға қарай мемлекеттік аппаратымыз кем дегенде 20-30 пайызға қысқаруы тиіс", — деді депутат.