Екі қазақстан азаматы бүгінгі таңда Индонезия заңын бұзып ұсталды.

Индонезияда есірткімен ұсталған екі Қазақстан азаматының өмірі қыл үстінде тұр, деп хабарлады 31 арнаның Информбюро ақпараттық бағдарламасы.

Өйткені қамауға алынған отандастарымыз өзге елдің заңымен өлім жазасы кесілуі мүмкін. Айта кету керек, бұл қылмыстық іс емес, халықаралық деңгейдегі күрделі жағдай.

Индонезияда есірткімен ұсталған екі қазақстандық азаматқа өлім жазасы берілуі мүмкін. Ақпаратты еліміздің сыртқы істер министрлігі растады. Оқиға биыл сәуір айында Бали аралында болған. Индонезия құқық қорғау органдарының мәліметінше, отандастырымыздан 49 грамм метамфетамин тәркіленген. Тергеу нұсқасы бойынша, күдіктілер есірткіні заңсыз таратпақ болған.

"Индонезия тарапы бізге бұл ақпаратты елшілікке жолдады. Екі қазақстан азаматы бүгінгі таңда Индонезия заңын бұзып ұсталды. Индонезия тарапы бүгінгі таңда тиісті тергеу жұмыстарын жүргізіп жатыр", – деді ҚР сыртқы істер вице-министрі Әлібек Бақаев.

Полицияның ақпараты бойынша, 49 грамм — бұл өте үлкен көлем, яғни есірткінің аса ірі партиясы.

Мамандардың айтуынша, мұндай мөлшер 500-ден астам адамға жетеді. Метамфетамин адам миына қатты әсер ететін есірткі түрі. Оны қолданған адам шындықтан алыстап кетуі мүмкін. Бірақ бұл әсер ұзаққа бармайды. Көп жағдайда бір рет қолданғаннан кейін-ақ адамда тәуелділік пайда болады.

Индонезия заңы бойынша, мұндай қылмыс үшін ең ауыр өлім жазасы беріледі. Дипломатиялық өкілдік Индонезияның құқық қорғау органдарымен және күдіктілердің туыстарымен тұрақты байланыс орнатқан. Сыртқы істер министрлігінің хабарлауынша, ұсталған азаматтар өз еріктерімен консулдық көмекке жүгінген. Бұл жағдай Қазақстан мен Индонезия арасындағы халықаралық-құқықтық ынтымақтастық мәселесін қайта қарау қажеттігін көрсетті. Себебі қазір екі мемлекет арасында сотталғандарды еліне қайтару туралы екіжақты келісім жоқ.

"2014 жылдан бастап біз бұл мәселені Индонезия тарапынан көтеріп жатырмыз. Енді бүгінгі күнге дейін ондай оқиға болмағандықтан Индонезия тарапынан ұстаным болған ондай құжаттардың қажеттігі жоқ деп. Бүгінгі таңда қажеттігі бар. Бірақ ондай құжаттар болмаса да біз заңды түрде Индонезия тарапына ресми сауал жасауға мүдделіміз", – деді Әлібек Бақаев.

Сол сауалға Индонезия тарапы жауап берсе соның негізінде екіжақты қарым-қатынас жалғасады. Есірткімен ұсталған отандастырымыздың қандай жазаға тартылатыны әзірге белгісіз. Өйткені қазір бұл іс бойынша сотқа дейінгі тергеу жүріп жатыр.