"Астана Опера" режиссёрі Еренбақ Тойкенов опера өнері әлеміндегі жетекші халықаралық жобалардың бірі – Австриядағы Вена опералық фестиваліне шақырту алды. Бұл туралы Мәдениет және ақпарат министрлігіне сілтеме жасаған KAZ.NUR.KZ хабарлайды.

Министрліктің мәліметінше, Вена опералық фестивалі 2 шілде — 31 тамыз аралығында өтеді.

Еренбақ Тойкенов Вольфганг Амадей Моцарттың "Барлық әйел осылай жасайды немесе Ғашықтар мектебі" және Джузеппе Вердидің "Травиата" қойылымдарын сахналауға қатысады.

Вена опера академиясының директоры Хесус Леонның айтуынша, академия дүние жүзінен небәрі төрт режиссёрді таңдап алған. Олардың қатарында Еренбақ Тойкенов те бар. Ол әлемдік біртуар опера режиссёрі Тим Клейдонның ассистенті ретінде шақырылған.

Айта кетейік, Еренбақ Тойкенов ұлттық, сондай-ақ әлемдік репертуардағы спектакльдерді қойып келеді. Бұл шақыру оның 2022 жылы Мәскеуде өткен Nano-Opera халықаралық опера режиссёрлері байқауындағы жеңісінің жалғасы.

Ол кезде Тойкенов әлемнің түпкір-түпкірінен қатысқан 200-ден астам опера режиссёрінің арасынан алға суырылып шыққан еді.

Nano-Opera байқауындағы жеңістің нәтижесінде Тойкенов "Астана Опера" сахнасында Сыдық Мұхамеджановтың "Айсұлу" қазақ ұлттық операсын қою құқығына ие болды. Спектакль жоғары бағаланып, тәуелсіз сарапшылар қойылымды "Жыл операсы" атағына лайық деп таныды.