Қазақстан Республикасы Еңбек және халықты әлеуметтік қорғау министрінің 2025 жылғы 13 маусымдағы бұйрығымен жұмыс іздеушілерді, жұмыссыздарды тіркеу және мансаптық орталықтар көрсететін жұмыспен қамтуға жәрдемдесу қағидаларына өзгерістер енгізілді, деп хабарлайды Zakon.kz.

Атап өтілгендей, мансап орталығының маманы жұмыс іздеуші ұсынған құжаттар мен жеке деректердің (мәліметтердің) шынайылығын мемлекеттік органдардың және (немесе) ұйымдардың ақпараттық жүйелерінен алынған деректер негізінде тексереді.

Жұмыс іздеушіні тіркеген күннен бастап оған лайықты жұмыс іріктеу бойынша көмек көрсету мерзімі бір жұмыс күнінен екі жұмыс күніне дейін ұлғайтылды.

Егер осы мерзім ішінде мансап орталығы жұмыс іздеушіге лайықты жұмыс ұсына алмаса, не жұмыс іздеуші ұсынылған жұмыстан бас тартса, онда "Еңбек нарығы" ААЖ жүйесінде ол автоматты түрде жұмыссыз ретінде тіркеледі.

"ААЖ Еңбек нарығы" мемлекеттік органдардың және (немесе) ұйымдардың ақпараттық жүйелерінен алынған мәліметтердің шынайылығын тексереді.

Жұмыссыз ретінде тіркелу немесе тіркеуден бас тарту туралы хабарлама enbek.kz порталы арқылы және (немесе) ұялы байланыс желісіндегі абоненттік құрылғы арқылы жіберіледі.

Мансап орталығының қызметкері сұраныс бойынша жұмыссыз ретінде тіркелу туралы немесе тіркеуден бас тарту туралы жазбаша хабарлама береді.

Сонымен қатар, мансап орталығының қызметкері тіркелген күннен бастап бір жұмыс күні ішінде жұмыссызға Мемлекеттік әлеуметтік сақтандыру қорынан жұмысынан айырылу жағдайына әлеуметтік төлем тағайындау үшін қажет құжаттар тізімін ұсынады.

Жұмыссыз ретінде тіркелу туралы ақпаратты ұсыну жұмыссыздың сұранысы бойынша enbek.kz порталы, "электрондық үкімет" веб-порталы және (немесе) электрондық цифрлық қолтаңба (ЭЦҚ) болған жағдайда ақпараттандыру объектілері арқылы электрондық құжат түрінде жүзеге асырылады.

Аталған ақпараттың қолданылу мерзімі – берілген күннен бастап 30 күнтізбелік күн.

Enbek.kz порталы жұмыс іздеушіні жұмыссыз ретінде тіркеу үшін мемлекеттік органдардың және (немесе) ұйымдардың ақпараттық жүйелерінен алынған ақпараттың шынайылығын Қағидалардың 41-тармағына сәйкес тексереді.

Аталған тармақта мынадай тұлғалардың жұмыссыз ретінде тіркелмейтіні көрсетілген:

• он алты жасқа толмағандар;
• жұмыспен қамтылғандар;
• зейнеткерлік жасқа жеткендер;
• жұмысы мен табысы (кірісі) жоқ екендігі туралы және өзге де жалған мәліметтерді ұсынғандар;
• жоғары сынып оқушылары мен студенттер (жұмыспен қамтуға жәрдемдесудің белсенді шараларына қатысқысы келетін);
• сот шешімімен түзеу жұмыстарына немесе қоғамдық жұмыстарға тартылған, сондай-ақ бас бостандығынан айыру жазасына кесілген (егер ол шартты түрде тағайындалмаған болса) адамдар.

Сонымен қатар, "Жұмыссыз ретінде тіркелу туралы ақпаратты ұсыну" мемлекеттік қызметін көрсетуге қойылатын негізгі талаптар тізбесі және жұмыссыз ретінде тіркелу туралы ақпаратты ұсынуға өтініш формасы Қағидалардан алынып тасталды.

Бұйрық 2025 жылғы 4 шілдеден бастап күшіне енеді.