Бүгін Жезқазғанда құтқарушылар түтін басқан пәтерден төрт баланы эвакуациялады, деп хабарлайды ТЖМ-ға сілтеме жасаған KAZ.NUR.KZ.

Ведомствоның мәліметінше, анасы анализ тапсыру үшін медициналық мекемеге шығып кеткен кезде, үйде 2 мен 13 жас аралығындағы төрт бала ұйықтап жатқан.

Сол сәтте олардың бірі оянып, ойыншықтарға толы пластик ыдысты сенсорлы электр плитаның үстіне қойып, қосқан. Салдарынан пластик жанып, бөлмелерді қою түтін басқан.

Түтіннің иісін бірінші болып көршісі сезіп, дереу 112 қызметіне хабарлап, пәтерде балалардың барын айтқан.

Құтқарушылар оқиға орнына жедел жетіп, арнайы құралдың көмегімен есікті ашып, төрт баланы қауіпсіз жерге эвакуациялаған.

Жедел жәрдем қызметі балаларды тексеріп, медициналық көмектің қажет еместігін анықтаған. Тұтанған пластик өздігінен сөнген. Зардап шеккендер жоқ.

"ТЖМ ата-аналарға сенсорлы плиталар балалар үшін аса қолжетімді әрі қауіпті екенін ескертеді. Электр құрылғыларын толық сөндіріп кетуді, балаларды қараусыз қалдырмауды және қауіпсіздік ережелерін сақтау қажеттігін еске салады", — дейді ТЖМ өкілдері.