Атырау облысы тұрғындары моторы бар белгісіз нысанның қалдықтарын тауып алған. ІІМ әскери-тергеу департаменті қалдықтар ұшқышсыз ұшатын аппараттікіне ұқсайтынын мәлім етті, деп хабарлайды KAZ.NUR.KZ.

Atyrau Online желілік басылымының деректеріне сай, Атырау облысының шекараға жақын ауданында моторы бар белгісіз нысан құлаған.

"Қазақстан-Ресей шекарасының маңында орналасқан Қоңыртерек ауылына жақын жерде белгісіз нысан құлаған. Куәгерлер оның қозғалтқышы болғанын, ал құлаған орын күйіп кеткенін жеткізді. Оқиға орнында күйік іздері бар.

Алдын ала дерек бойынша нысан ашық далаға құлаған. Жергілікті тұрғындар түтінді байқап, оқиға орнынан техникалық құрылғыға ұқсас заттың металл қалдықтарын тапқан", — делінген жарияланымда.

KAZ.NUR.KZ тілшісі ҚР ІІМ әскери-тергеу департаментінің баспасөз қызметіне пікір сұрап жүгінді. Ведомство өкілдері аталған дерек бойынша тексеріс басталғанын жеткізді.

"Атырау облысы полиция департаменті құзырлы қызметтермен бірлесе ұшқышсыз ұшатын ұшу аппаратының қалдықтарына ұқсас заттың табылу дерегі бойынша тексеріс шараларын өткізіп жатыр.

Нысан дала аймағында табылды, қандай да бір залал туралы ақпарат жоқ. Оқиғаның мән-жайы анықталып жатыр", — деді олар.

Бұған дейін Ресей сыртқы істер министрлігінің өкілі Мария Захарова Қазақстан аумағында байқалған ұшқышсыз ұшатын аппараттар туралы мәлімдеме жасағанын жазған едік.

Ресей СІМ 19 және 20 маусымда Батыс Қазақстан облысы аумағында ондаған ұшқышсыз ұшатын аппараттардың ұшу деректері тіркелгенін және бұл "РФ аумағына кірмекші болған" украиналық дрондар екенін мәлімдеді.

"Біздің одақтас және ҰҚШҰ мүшесіне қатысты мұндай әрекеттерді қатаң айыптаймыз. Жауапты үкімет және бейінді халықаралық құрылымдарды мұндай провокацияларға назар аударып, тиісті деңгейде әрекет етуге шақырамыз.

Болған жағдай ҰҚШҰ аясында ұжымдық қауіпсіздік шараларын нығайту қажеттілігін кезекті рет дәлелдеп отыр", — делінген Захарова мәлімдемесінде.