2025 жылғы 20 маусым күні күндіз Алматы қаласындағы Назарбаев даңғылында жолаушылар автобусы мен жеңіл автокөлік қатысқан жол-көлік оқиғасы орын алды.

Zakon.kz тілшісінің апат орнынан хабарлауынша, оқиға Макатаев пен Мәметова көшелерінің арасында болған.

Hyundai Sonata автокөлігі солтүстік бағытта оң жақ жолақпен келе жатқан. Жүргізуші ауланың ішіне бұрылмақ болған сәтте, көлікке 210-маршруттағы автобус қатты жылдамдықпен келіп соғылған.

Қатты соққыдан кейін Hyundai жолдан шығып кетіп, бордюр мен арықты асып өтіп, жарнамалық тақтаға соғылған.

Жол апаты салдарынан шетелдік көліктің жүргізушісі зардап шекті. Ол ауруханаға жеткізілді.

Автобус жүргізушісінің айтуынша, автобус бос болған, сол себепті басқа жолаушылар зардап шекпеген.

Қазіргі уақытта полиция қызметкерлері апаттың мән-жайын анықтап жатыр.