Маманның айтуынша, науқастардың үштен бірі қайтыс болады .

Елімізде жыл сайын 45 мыңнан астам адам инсультке шалдығады, деп мәлімдеді Ұлттық шұғыл медицинаны үйлестіру орталығының басқарма төрағасы, инсульт мәселелері жөніндегі бас штаттан тыс маман Ержан Әділбеков. Маманның айтуынша, науқастардың үштен бірі қайтыс болады.

Инсульттың негізгі себептері қандай?

Ержан Әділбековтің сөзінше, инсульттің негізгі себебі – артериялық гипертензия (жоғары қан қысымы), қант диабеті және семіздік. Сонымен қатар шылым шегу, физикалық белсенділіктің аздығы, дұрыс тамақтанбау сынды факторлар да әсер етеді.

"Қазір туа біткен жүрек ақаулары мен ми тамырларының аневризмасы сияқты диагноздар да инсульт қаупін арттырып отыр, – деді ол елордада өтіп жатқан "Инсульт мектебі – 2025" ғылыми-практикалық конференциясында.

Оқи отырыңыз: Жазда бетке қалай күтім жасау керек? Косметологтан 8 кеңес

Күйзеліс – инсультке әкелетін тағы бір қауіп

Маманның айтуынша, созылмалы күйзеліс пен үнемі стреске түсу де инсультке әкеп соғуы мүмкін.

"Адам күйзелістен шыға алмай жүрсе, бұл психологиялық қана емес, физиологиялық ауырлық әкеледі. Қан қысымы тұрақты түрде жоғарылайды. Жұмыссыздық, отбасындағы қиындықтар – мұның бәрі ағзаға артық жүк. Инсультті көбіне егде жастағы адамдардың ауруы деп қабылдаймыз. Алайда бұл дерт жастар арасында да жиілеп келеді. Бұл – алаңдатарлық жағдай, – дейді Ержан Әділбеков.

Статистика не дейді?

2023 жылы елімізде 49 мыңға жуық адам инсульт диагнозымен тіркелген. Оның ішінде 11,8 пайызы аурухана ішінде көз жұмса, тағы 6,1 пайызы ауруханадан шыққан соң, бір ай ішінде қайтыс болған.