Сондай-ақ, ол құқық қорғау қызметкерінің заңды талабына бағынбай, полиция бөліміне барудан бас тартқан.

Қарағандыда көпсалалы облыстық балалар ауруханасының дәрігерлеріне шабуыл жасаған ер адам жазаға тартылды, деп хабарлады облыстық соттың баспасөз қызметі.

Оқиға 12 маусым күні болған. Алдын ала мәлімет бойынша, 38 жастағы ер адам дәрігерлермен болған ауызекі жанжалдан кейін оларды ұрып-соққан. Кейін оның ауруханадағы бір науқастың туысы екені анықталды.

Салдарынан дәрігерлер ауыр жарақат алып, облыстық аурухананың шұғыл нейрохирургия бөліміне жеткізілген. Жағдайдың ауырлығына байланысты денсаулық сақтау министрі Ақмарал Әлназарова ауруханаға барып, зардап шеккен медицина қызметкерлеріне жеке өзі көңіл айтты. Министр бұл оқиғаны "өте сорақы зорлық әрекеті" деп бағалады.

Оқи отырыңыз: Ақтөбе облысында құдыққа құлаған қыз бен оны құтқармақ болған ер адам көз жұмды

Құқық қорғау органдары күдіктіні екі айға қамауға алды. Сонымен қатар, оның жақын туыстарының бірі де ұсталған.

Сот мәліметінше, ер адам дәрігерлерге былапыт сөздер айтып, қоғамға құрметсіздік көрсетіп, ұсақ бұзақылық жасаған. Сондай-ақ, құқық қорғау қызметкерінің заңды талабына бағынбай, полиция бөліміне барудан бас тартқан.

Айыпталушы кінәсін толық мойындап, жасаған ісіне өкінетінін білдірген. Бұл жағдай сотта жеңілдететін мән-жай ретінде ескерілді. Соның нәтижесінде оған 10 тәулік әкімшілік қамау жазасы тағайындалды.