Израильдің бүгінгі шабуылдарына қарымта қайтарған Иранның баллистикалық зымырандары Беэр-Шева қаласындағы ауруханаға түсті. 32 адам зардап шеккен. Иран аурухана маңындағы әскери нысанды көздегенін мәлімдеді. Тегеран бүгін Израильге 20 шақты зымыран жіберген. Бірнеше қалада 65 адам жараланды. Ал Израиль армиясы Арак пен Натанз қалаларындағы ядролық реакторларға соққы берді. ЦАХАЛ-дың мәлімдеуінше, Арактағы нысан ядролық қару жасауға қажет плутоний өндіруге арналған. «Би-Би-Си» мәліметінше, шабуыл басталғалы Иранда 639 адам қаза тапқан. Соңғы мәліметтерге сай ел аумағында жарты тәуліктен астам уақыт бойы интернет толық өшірілген. Иранның байланыс министрлігі Израиль желіні әскери мақсатта пайдаланғандықтан, ғаламторды уақытша шектегенін мәлімдеді. Екі ел арасындағы әуе шабуылы маусымның 13-де басталды. Израиль бірінші болып Иранның ядролық нысандарын, жоғары шенді әскери басшылары мен физик ғалымдарын нысанаға алды. Бұған қарсы Тегеран Израиль аумағына жүздеген ракета жіберген.

Арай Төлегенқызы