Қытайлық танымал инфлюенсер Таотао Қазақстан туризмінің елшісі атанды, деп хабарлайды KAZ.NUR.KZ Kazakh Tourism ұлттық компаниясының баспасөз қызметіне сілтеме жасап.

Жылқыға ерекше қызығушылық танытатын Таотао 7 млн-нан астам оқырманына Қазақстанның мәдениеті, табиғаты және қонақжай халқы туралы құнды ақпараттарды жариялап жүр. Сол үшін Kazakh Тourism танымал инфлюенсерге "Қазақстан туризмінің елшісі" мәртебесін табыстады.

Ұлттық компания мәліметінше, Таотао еліміздің үш аймағында — Шығыс Қазақстан мен Алматы облыстарының көрікті жерлерінен бастап, Астана мен Алматы қалаларында болып үлгерді. Ол жазылушыларына дәстүрлі қазақ киімдерін көрсетіп, бүркітпен аң аулау көріністерін, ұлттық тағамдарымыз бен мәдениетімізді таныстырып жүр.

Айта кетейік, 2018 жылдан бері Kazakh Tourism өз бастамасымен және ақысыз түрде Қазақстанды әлемге таныстырып жүрген тұлғаларға "Қазақстан Республикасының туризм елшісі" атағын береді. Бұл — мәдениет, туризм, медиа және цифрлық кеңістікте ел туралы шынайы шабытпен әңгімелейтін адамдар.

Былтыр бұл мәртебеге жапон блогері Юдзи Нацума ие болса, енді оған Таотао қосылып отыр.