Астанадағы автобус апатының кесірінен аяғынан айырылған қызға бірінші топтағы мүгедектік берілді. Еңбек министрі сегіз жасар бүлдіршіннің барлық әлеуметтік шығынын мемлекет өз мойына алады деп отыр, деп хабарлайды "КТК" арнасы.

Баланың өсуіне қарай жыл сайын алмасатын протез бен оңалту қызметіне еңбек және денсаулық сақтау министрліктері тікелей жауапты.

"Бұл қайғылы жағдайға душар болған қыз бойынша айтарым, барлық протез бен оңалту қызметін мемлекет өз мойнына алады. Алған жарақаты мен оның салдарына байланысты қызға бірінші топтағы мүгедектік берілді. Соған сәйкес ай сайын 100 мың теңгеден аса қаражат беріледі. Ал анасына күтім үшін 70-80 мың теңге төленеді. Көпбалалы отбасы ретінде де басқа да төлемдер алады", — дейді Еңбек және халықты әлеуметтік қорғау министрі Светлана Жақыпова.

Күні кеше автобус апатынан зардап шеккен қыз ауруханадан үйіне шығарылды. Жауапты дәрігерлер арнайы оңалту бағдарламасын әзірлеуді бастап кетіпті. Алған жарақаты толық жазылғаннан кейін протездеу мәселесі қолға алынады.

Оқу-ағарту министрі Ғани Бейсембаев қыздың қыркүйекте оқуын жалғастыруына еш кедергі болмайды деп отыр. Бастапқыда ұстаздар қашықтан оқу сабағын жүргізсе, уақыт өте келе, басқа бүлдіршіндермен бірге өз сыныбында білім ала алады. Тек қызын тасымалдау машақаты ата-анасының мойнында болмақ.

"Ата-анасы қарсы болмаса, баланың денсаулығы сәйкес келіп жатса, мектепте әрі қарай білімін жалғастыруға заңнамада толық мүмкіндік берілген. Бірінші кезекте баланың денсаулығы толық дұрысталғанша, үй жағдайында білім алумен қамтылады. Ал болашақта ата-анасы өздері алып келіп, мектепте білім алуы жалғасуы мүмкін", — дейді Оқу-ағарту министрі Ғани Бейсембаев.

Дереккөз: "КТК" арнасы

Еске салсақ, бұған дейін Астанада автобус апатының салдарынан аяғынан айырылған қыз баланың отбасына пәтер берілетіні хабарланған еді.