Экология және табиғи ресурстар министрі Ерлан Нысанбаев еліміздің Қытайға 1500 бас киікті беруге қатысты ойын ортаға салды.

Министрдің сөзінше, Қытайға киікті сыйға тарту – экожүйеге, аграрлық секторға айтарлықтай әсер етпейді, деп хабарлайды inbusiness.kz сайты.

– Шын мәнінде бұл киіктердің таралу аймағы. Біз бүгінде әлемдік популяцияның 99 пайызын иеленіп отырмыз. Менің ойымша, киіктердің популяция тұрақтылығын қамтамасыз ету үшін оларды байырғы мекеніне қайтару керек. Осылайша біз киік популяциясының жалпы тұрақтылығын нығайтамыз, бұл өте маңызды, – деді Ерлан Нысанбаев Мәжіліс қабырғасында тілшілердің сауалына жауап бере тұрып.

Министрдің мәлімдеуінше, Қытайға 1,5 мың киікті сыйға тарту, экожүйеге және аграрлық секторға әсер етпейді.

– 1500 киік ешқандай рөл атқармайды. Бірақ, тұрақтылықты қамтамасыз ету жағынан көмектеседі, – дейді ол.

Сондай-ақ ведомство басшысы киіктерді беру мерзімі әзірге нақты белгісіз екенін айтты.

– Жақында біздің және Қытай ғалымдарымен тікелей жұмысты бастаймыз. Біріншіден, Қытай ғалымдары киік мекендейтін жерді аралап, жайылым базасы толық па, жоқ па соны тексеруі қажет. Содан кейін көшіру тәсілдері қарастырылады, қандай тәсіл оңтайлы, соны таңдаймыз, – деп толықтырды Е. Нысанбаев.

Айта кетейік, Қазақстан Қытайға 1500 бас киікті тарту ететінін жазған болатынбыз. Мұндай жаңалықты Ақорданың баспасөз қызметі таратты.