Үндістанның Ахмедабад қаласында Air India әуе компаниясына тиесілі ұшақтың апатқа ұшырауына қозғалтқыштың істен шығуы себеп болуы мүмкін, деп хабарлайды The Wall Street Journal басылымына сілтеме жасаған KAZ.NUR.KZ.

Air India апатына қатысты тергеу жұмысымен таныс адамдардың айтуынша, тергеушілер ұшақта апаттық турбина жұмыс істегеніне сенімді. Бұл ұшақтың қозғалтқыштары жоғарыға көтерілер кезде дұрыс жұмыс істеп тұрғанына күмән туғызады.

Басылым зерттеген әуе компаниясының Boeing 787 нұсқаулығына сәйкес, Ram Air Turbine (RAT) апаттық жүйесі екі қозғалтқыш істен шыққанда, гидравликалық қысым төмендегенде, кабинаның аспаптарында қуат жоғалса немесе ұшақтың электр сорғыларында ақау болса, ұшу кезінде автоматты түрде іске қосыла алады.

Сондай-ақ ұшқыштар қажет болса, RAT-ты қолмен де іске қоса алады. АҚШ-тың аэроғарыштық қауіпсіздік жөніндегі кеңесшісі Энтони Брикхаустың айтуынша, ұшқыш екі қозғалтқыш та істен шықты деп ойлайтын жағдайлар жиі кездеседі.

"Коммерциялық авиацияда қос қозғалтқыштың істен шығуы өте сирек кездеседі", — дейді ол.

Басылымның хабарлауынша, әзірге Boeing ұшақтары мен GE Aerospace қозғалтқыштарын өндірушілер түсінік беруден бас тартқан.

Еске сала кетейік, өткен аптада Үндістанның Гуджарат штатындағы Ахмедабад қаласы әуежайының маңында жолаушылар ұшағы апатқа ұшырады.

Әуекомпания мәліметінше, жолаушылардың – 169-ы Үндістан, 53-і Ұлыбритания, жетеуі Португалия және біреуі Канада азаматы болған.

Ұшақ апатында борттағы 242 адамнан 11А орнында отырған ер адам ғана аман қалған.