«Қазақстан Республикасының мемлекеттік қызметі туралы» Заңының талабына сәйкес, уәкілетті орган (оның аумақтық бөлімшелері) мемлекеттік органдардың Қазақстан Республикасының мемлекеттік қызмет саласындағы заңнамасын сақталуын, мемлекеттік қызметшілердің қызметтік әдепті сақтауын, мемлекеттік қызметтер көрсету сапасын Қазақстан Республикасының заңнамасына сәйкес мемлекеттік бақылауды жүзеге асырады.

Бұл ретте, Агенттіктің Түркістан облысы бойынша департаменті 2024 жылдың қорытындысымен өңірдегі жергілікті атқарушы органдардың мемлекеттік қызметшілеріне қолданылған тәртіптік жазаларға талдау жұмыстарын жүргізді.

Талдау нәтижесімен аталған мерзімде 1825 лауазымды адам тәртіптік жауапкершілікке тартылып, 2023 жылдың осы кезеңімен салыстырғанда қолданылған тәртіптік жазалардың саны 10 % артқанын көрсетті.

Осы орайда, кейбір мемлекеттік органдарда мемлекеттік қызметшілерге тәртіптік жаза қолдану барысында заңнама талаптары сақталмай өрескел бұзушылықтар орын алған.

Сәйкесінше, Департаменттің араласуымен 53 мемлекеттік қызметшіге негізсіз тәртіптік жаза қолдану туралы актілердің күші жойылып, құқықтары қалпына келтірілді.

Бұдан басқа, Департаментпен 2025 жылдың I тоқсанының қорытындысымен мемлекеттік органдардың тәртіптік комиссиясының жұмысының есебіне талдау жүргізіліп, нәтижесінде 426 мемлекеттік қызметшіге тәртіптік жаза қолданылып, өткен жылдың сәйкес кезеңімен салыстырғанда қолданылған тәртіптік жазалардың саны 12,7 % азайған.

Дегенмен, Департаментпен жоспарлы тексеру мен мемлекеттік қызметшілерге қолданылған тәртіптік жазаларға талдау жұмыстарын жүргізу барысында 26 мемлекеттік қызметшіге негізсіз тәртіптік жаза қолдану деректері анықталды.

Өз кезегінде, Департаменттің ұсынуымен заңнама талаптары бұзыла отырып қолданылған тәртіптік жазалардың күші жойылып, 26 мемлекеттік қызметшілердің құқықтары қорғалды.

Бұзушылықтардың басым көпшілігі мемлекеттік қызметшілерге тәртіптік жаза қолдану мерзімдерін сақтамау, қызметтік тергеп-тексеру тағайындау тәртібін сақтамау, қызметшілердің тиісті түсініктемелері алынбастан тәртіптік жаза қолдану бағыттарында орын алған.

Бұл көрсеткіштер Департамент тарапынан мемлекеттік қызметшілердің құқықтарын қорғау және бұзылған құқықтарын қалпына келтіру бойынша жұмыстарды жүргізгенінің айғағы.

Осы ретте, Департаментпен ұдайы түрде мемлекеттік қызметшілерге тәртіптік жаза қолдану қағида талаптарының сақталуы бағытындағы жұмыстар өз жалғасын табатын болады.

Д.СУРТЕКОВ,

Қазақстан Республикасының Мемлекеттік қызмет істері

агенттігінің Түркістан облысы бойынша департамент басшысының орынбасары,

Әдеп жөніндегі кеңес хатшылығының меңгерушісі