Индонезияның Шығыс Кіші Зонд аралдары провинциясындағы Левотоби Лаки-Лаки жанартауы атқылап, аспанға 10 шақырым биіктікке дейін вулкандық күл бұлтын тудырды.

Апат салдарынан аймақтағы халықаралық және ішкі әуе рейстері тоқтатылды, деп жазады inbusiness.kz сайты.

Angkasa Pura Indonesia мемлекеттік компаниясының мәліметінше, жанартау белсенділігінің артуына байланысты Бали аралындағы Нгурах-Рай халықаралық әуежайында және өзге де бірнеше әуежайда рейстер уақытша тоқтатылған.

Тоқтатылған рейстердің қатарында австралиялық Jetstar мен Virgin Australia, үндістандық Air India, Жаңа Зеландияның Air New Zealand, сингапурлық Singapore Airlines және қытайлық Juneyao Airlines компаниялары бар. Сондай-ақ AirAsia әуе компаниясы да бірнеше ішкі бағытын кейінге шегерген.

Левотоби Лаки-Лаки — Левотоби деп аталатын қос жанартаудың бір шыңы. Күл бұлты саңырауқұлақ пішінінде таралып, 150 шақырым қашықтағы елді мекендерден де байқалған.

Апат аймағында төтенше жағдай жарияланып, жақын маңдағы ауыл тұрғындары эвакуациялануда. Вулкандық күлдің таралуы халық денсаулығына қауіп төндіріп отыр.

Индонезия Тынық мұхиттағы "Отты шеңберде" орналасқан — бұл аймақ сейсмикалық белсенділігімен және жиі жанартау атқылауымен белгілі. Ел аумағында 130 белсенді жанартау бар.

Айта кетейік, 2024 жылғы қарашада дәл осы жанартау атқылауынан 9 адам қаза тауып, ондаған адам жараланған болатын.