Желіде “Шери, шери леди” әнімен жарқ етіп танылған Нұрәлі Тәңірбергеннің танымалдығы шекара асып, Ресейдің әйгілі ток-шоуы — Андрей Малаховтың бағдарламасына дейін жетті. El.kz интернет порталының “Кейіпкер” подкастының жаңа шығарылымында ол қызмет пен өнерді қалай қатар алып жүр? Малахов шоуына қалай шақырылды? Үш баланың әкесі ретінде отбасы, тәрбие, шабыт жайлы ойларын ортаға салды.

Оның айтуынша, Малахов шоуына шақырту тіпті ойламаған жерден келген.

— Бәрі TikTok-тағы бір видеодан басталды. Бір күні түнгі кезекшілігімде әріптесіме «Мына пікірді қарашы, ертең Малахов шоуына шақырып қалса осылай-осылай сөйлеймін» деп қалжыңдап айтып, іштей визуализация жасап қойдым. Содан арада екі апта өткенде, Instagram-да директке бір қыз жазды: «Я редактор передачи Андрея Малахова. Не хотели бы поучаствовать у нас?» деп. Алғашында алаяқ шығар деп сенбедім, бірақ кейін олармен байланысып сөйлескен соң, шынымен де шақырту екенін түсіндім, – дейді Нұрәлі.

Бұл – Нұрәлінің үлкен сахнаға алғаш шығуы. Айтуынша, Ресейге ұшып барған сәтке дейін өзі де сенбей жүрген.

— Бізге 80-жылдардағы ән орындау керек деді. Мен бірден Modern Talking тобының «Cheri, Cheri Lady» әнін таңдадым. Шоу алдында бір-ақ рет дайындалуға мүмкіндік болды. Сол кезде-ақ «Сахнаға шыққанда барлығын билетіп, ерекше әсер қалдыруым керек» деген оймен шықтым. Расында да, отырғандардың бәрін орындарынан тұрғызып билету – мен үшін тарихи сәт болды, – дейді ол қуанышпен.

Нұрәлінің айтуынша, бұл кездесу оған жаңа мүмкіндіктер есігін ашып берген. Бұрын бейнежазба арқылы танылып жүрген ол енді халықаралық деңгейде сахнаға шығып, өнерін кең аудиторияға паш етті.

— Бұл мен үшін үлкен тәжірибе. Кезінде қарапайым түсірілген видео осындай деңгейге жеткізеді деп мүлде ойламаппын. Ең бастысы — өзіңе сену керек, – дейді ол.

Қазір әлеуметтік желі қолданушылары оның энергетикасын, харизмасын және ерекше орындау мәнерін жоғары бағалап жатыр.