Әлемдік БАҚ ChatGPT-мен байланысты жағдайларда кейбір пайдаланушылар психикалық күйзеліске ұшырағанын жазуда. Олардың бірі қайғылы аяқталды, деп хабарлайды Zakon.kz.

Флорида штатының 64 жастағы тұрғыны Кент Тейлор New York Times басылымына берген сұхбатында өзінің 35 жастағы ұлы бұрын биполярлық бұзылыс пен шизофрения диагнозын алғанын және ол полицияға пышақпен шабуыл жасағаннан кейін оққа ұшқанын айтты.

Ер адам ChatGPT арқылы рөлдік әңгіме барысында "Джульетта" есімді AI кейіпкеріне қатты байланып қалған. Біраз уақыт өткен соң ол OpenAI компаниясы Джульеттаны "өлтірді" дегенге сеніп қалған. Содан кейін ол компания басшылығынан кек қайтармақ болып, "Сан-Франциско көшелерін қан басады" деп қорқыта бастаған. Ақыр соңында ол әкесіне "Мен бүгін өлемін" деген хабарлама жіберіп, шақыртумен келген полиция қызметкерлеріне пышақпен шабуыл жасаған. Полиция оны атып өлтірді.

Тағы бір оқиғада, Нью-Йорктің 42 жастағы тұрғыны, бухгалтер Юджин Торрес ChatGPT-ті жұмыс мақсатында қолдана бастаған. Бірақ уақыт өте келе ол жасанды интеллектпен "симуляция теориясы" туралы идеяларды талқылаған. ChatGPT оны әлем жасанды шындық екеніне сендіріп, ұйықтататын дәріні кетаминнің үлкейтілген дозасына ауыстыруды ұсынған.

OpenAI компаниясы New York Times-қа берген түсініктемесінде:

"Жасанды интеллект күнделікті өмірдің бір бөлігіне айналып жатқандықтан, онымен өзара әрекетте абай болу керек. ChatGPT бұрынғы технологияларға қарағанда әлдеқайда жауапты әрі жеке қарым-қатынас құралы сияқты әсер қалдыруы мүмкін, әсіресе осал адамдар үшін. Сондықтан да тәуекелдер артады", – деп мәлімдеді.

Futurism сайтының жазуынша, оларға ChatGPT-ке психологиялық тұрғыда тәуелді болып қалған адамдар туралы көптеген шағымдар келіп түсуде – ажырасулардан бастап, жүйке жүйесінің бұзылуына дейін.

Мысалы, бір әйел бұрынғы күйеуінің OpenAI чат-ботын "ана" деп атай бастағанын, өзін жаңа AI дінінің "мессиясы" деп жариялап, шаман киімдерін киіп, жасанды интеллект жасаған рухани таңбалармен татуировка жасатқанын айтқан.