Перизат есімді желі қолданушысы 8 жасар ұлының гей болғысы келетінін айтты.

Бұл туралы Caravan.kz медиа порталы хабарлайды.

Алматылық ананың ұлының қалауы туралы айтқан видеосы желіде желдей есуде. Ол бала тәрбиесінде ананың шектеу қойып, негативті эмоциялар көрсетпеуінің маңызды екенін айтқан.

“Менің 8 жасар ұлым гей болғысы келетінін айтты. Ол мұны айтқан кезде балаға “масқара” деген секілді негативті эмоцияларды көрсетпеу, айқайламау өте маңызды. Себебі, сіз солай жасайтын болсаңыз ол сізбен сырларын бөліспейтін, әңгімесін айтпайтын болады. Оның бәрін достарына, сырттағы адамдарға айтып, ақыл-кеңесті солардан іздейтін болады. Сондықтан мен өзімнің таңқалысымды жасырдым. Мен “жарайды, бірақ неге гей болғың келеді” деп сұрадым. Ол “мен ер жеткен соң сүйікті қызыма гауһар тас, көлік, үй сыйлауға міндеттімін ғой. Мен олай болғанын қаламаймын. Ал мен гей болсам, жігітім өзі ақша табатын болады” деп жауап берді. Балалардың қазіргі түсінігі осындай. Егер оларға кішкентай кезінен сен есейгенде “осы нәрсені істеуге міндеттесің” десеңіздер, қыздар қыз болғысы, жігіттер жігіт болғысы келмейді”, — дейді ол.

Аталмыш видеодағы ананың пікірін қызу талқылап жатқан желі қолданушылары мұндай түсінік бала тәрбиесінде қазақы тәрбиенің жетіспеуінен болатынын айтуда.

”Батыстық пропаганданың нәтижесі осындай ұрпақ”, “Ауылға апарып, таза қазақы тәрбиені көрсету керек қой. Мұның барлығы бала өзі біледі деген орысша тәрбиенің кесірі”, “Видео авторы баламды қолдап жатырмын деп ойлап жатыр-ау, бірақ бұл масқара. Қазақ қоғамы коучсымақтарды тыңдап, өз өзегінен безді”, — деп жазды олар.