Атырауды соңғы үш күннен бері түтін торлап тұр. Қаланы қою қара ыс басқан. Тұншыққан тұрғындар ыстың иісінен есік-терезесін аша алмай, далаға да шығуды қойған, деп хабарлайды "КТК" арнасы.

Қара түтінге тұншыққан атыраулықтар наразылық білдіріп жатыр. Қаладағы бұл жағдайға басты себеп — Ақжайық табиғи резерватындағы қамыс өрті. Бірнеше аптадан бері төтеншеліктер бұл аумақтағы өртті өшіре алмай әлек. Мемлекеттің қорғауындағы аумақта үш жерден өрт шыққан.

Жалын мыңға жуық гектар жерді алды. Сонымен қатар экологтар қаладағы өндірістік аумақта күкірт сутегінің шамадан тыс, яғни шекті нормадан 11 есе асып кеткенін анықтады. Тұрғындар кәсіпорындар түтінді пайдаланып ауаға лас қалдықтарын да шығарып жатыр деп наразы.

Дегенмен Экология департаменті зертхана қорытындысынан кейін ғана нақты айта аламыз деп отыр. Ал бүкіл қаланы көк түтінге тұншықтырған "Ақжайық" резерватындағы өрттің шығуына адами фактор себеп болды дейді мекеме басшылары.

"Өрттің басына барған кезде өрт үш жерден ара қашықтығы 10-15 шақырымда болды. Оған жету өте қиын. Сондықтан ол, меніңше, бүкіл резерваттың пайымдауынша, әдейі, қасақана жасалған әрекет. Қылмыстың бір түрі", — дейді "Ақжайық" мемлекеттік табиғи резерваты мекемесінің директоры Дәурен Есқабылов.

Дереккөз: "КТК" арнасы