Соңғы 5 жылдың ішінде медицина қызметкерлеріне күш қолдану арқылы жасалған 160-қа жуық шабуыл тіркеліп, олардың салдарынан дәрігерлер түрлі жарақаттар алған

Денсаулық сақтау министрлігі Ішкі істер министрлігімен бірге медицина ұйымдарында қоғамдық тәртіпті сақтау, қызметтік міндетін атқарып жүрген медицина қызметкерлеріне күш көрсету мен агрессияны болдырмау үшін қауіпсіздікті қамтамасыз етуге бағытталған ортақ тұжырымдаманы айқындайтын болады, деп хабарлайды Қазақстан Республикасы Денсаулық сақтау министрлігінің баспасөз қызметінен.

Медицина мекемесінің қауіпсіздік талаптары көрсетілетін көмектің түрі мен деңгейіне, сондай-ақ пациенттер легінің тығыздығына байланысты белгіленетін болады.

Медицина қызметкерінің өмірі мен денсаулығына қауіп төндірген әрбір адам заңға сәйкес қатаң жазалануы тиіс. Ешбір жағдай мұндай әрекетті ақтай алмайды. Әрбір дәрігер, фельдшер, мейіргер — біз үшін қымбат. Біз — бір командамыз. Әрбір маман өзін қауіпсіз сезінуі қажет", — деді Денсаулық сақтау министрі Ақмарал Әлназарова Қарағандыда пациенттің туысы тарапынан шабуылға ұшыраған балалар дәрігерлеріне барған сапарында.

Министрлік басшысының айтуынша, қазір пилоттық жоба ретінде Астана мен Алматы қалаларында жедел жәрдем қызметкерлеріне жетондар енгізіліп жатыр. Бұл да тәртіп бұзуға бейім адамдарға психологиялық тосқауыл болады. Сонымен қатар барлық ауруханалар мен емханаларда шұғыл оқиға кезінде жедел әрекет етуге арналған дабыл батырмалары жұмыс істеуі тиіс.

Медицина қызметкерлерінің қауіпсіздігін қамтамасыз етуге арналған кешенді шаралар Денсаулық сақтау министрлігінің өзінің, Ішкі істер министрлігінің, басқа да мүдделі мемлекеттік органдар мен жергілікті атқарушы органдардың қатысуымен әзірленетін болады.

Соңғы 5 жылдың ішінде медицина қызметкерлеріне күш қолдану арқылы жасалған 160-қа жуық шабуыл тіркеліп, олардың салдарынан дәрігерлер түрлі жарақаттар алған.