2025 жылғы 16 маусымда ҚР Сыртқы істер министрлігінде өткен брифингте министрліктің ресми өкілі Айбек Смадияров ескертуге қарамастан, соңғы күндері Қазақстаннан Біріккен Араб Әмірліктеріне ұшып шыққан ұшақтардың толық жүктемемен ұшқанын мәлімдеді, деп хабарлайды Zakon.kz тілшісі.

Спикердің айтуынша, қазіргі уақытта БАӘ-ден Қазақстанға кейбір әуе компанияларының рейстерінің тоқтатылуына байланысты шамамен 300 қазақстандық елге оралуда уақытша қиындыққа тап болды. Олардың көпшілігі – туристер.

"Оқиға орнында біздің дипломаттар жұмыс істеп жатыр. Жақын күндері авиакомпаниялармен жасалған келісімдердің арқасында азаматтардың жартысынан көбі елге оралады деп күтілуде. Белгілі болғандай, 14 маусымда ҚР Туризм және спорт министрлігінің үндеуі жарияланып, Таяу Шығыстағы ахуалдың ушығуына байланысты Иран, Израиль, Сирия, Ирак, Иордания және Ливан үстінен, аумағында және маңында ұшуға тыйым салынғаны хабарланған болатын", – деді Смадияров.

Ол туристерге жағдайдың қалай өрбитініне мұқият назар аударып, әсіресе БАӘ мен Парсы шығанағы елдеріне сапар жоспарлаған кезде ықтимал тәуекелдерді ескеру қажеттігін атап өтті.

"Қажет болған жағдайда қазақстандық туристерді елге қайтару "Туристік қамқор" қоры және әуе компаниялармен бірлесе отырып жүзеге асырылады. Қазақстан Республикасының мемлекеттік органдарының ескертулеріне қарамастан, соңғы екі күнде Қазақстаннан БАӘ-ге бағыт алған ұшақтар толық жүктемемен ұшты. Таяу Шығыс елдеріне сапар шегу кезінде барлық қауіптерді мұқият саралап, саналы шешім қабылдауларыңызды сұраймыз", – деді Сыртқы істер министрлігінің өкілі.

2025 жылғы 13 маусым күні таңертең Израиль Иранның ядролық және әскери инфрақұрылымына соққы берді. Шабуыл салдарынан Иран Ислам революциясы сақшылар корпусының Бас штабының бастығы Хоссейн Салами және Азад Ислам университетінің президенті Мұхаммад Техранчи қаза тапты.

Таяу Шығыстағы жағдайдың ушығуына байланысты Израильдегі ҚР елшілігі сол елде жүрген қазақстандықтарға шұғыл үндеу жариялады.