2025 жылғы 16 маусымда ҚР Атомдық энергия агенттігі Қазақстандағы АЭС қалдықтарын басқару мәселесінің қалай шешілетіні туралы айтып берді, деп хабарлайды Zakon.kz тілшісі.

Агенттіктің ақпаратынша, қуаты 1200 мегаватт болатын энергоблокты пайдалану кезінде жыл сайын шамамен 60 текше метр радиоактивті қалдық пайда болады.

"АЭС өндірісте 60 жылдан астам уақыт жұмыс істеп келеді, осы кезеңде екі блокты станцияда жалпы шамамен 7 200 тонна қалдық түзіледі. Қазіргі радиоактивті қалдықтарды қайта өңдеу технологиялары оларды қауіпсіз сақтау мен кейіннен жерлеуді толық қамтамасыз етеді. Салыстыру үшін айтар болсақ, көмір электр станцияларының қалдықтары жыл сайын жүздеген мың тоннаға жетеді. Сонымен қатар, пайдаланылған немесе сәулеленген ядролық отынмен жұмыс істеу мәселесі бөлек қарастырылады. Пайдаланылған отын әлі де жанбаған уранды ұстайды, сондықтан оны қайта өңдеп, жаңа ядролық отын ретінде пайдалану мүмкіндігі бар, бұл ядролық отын циклының тиімділігін айтарлықтай арттырады", – деп толықтырды ведомствоның баспасөз қызметі.

Сонымен, қуаты 1200 мегаватт болатын екі блокты станцияда жылына шамамен 50 тонна пайдаланылған ядролық отын түзіледі, оның көлемі шамамен 5 текше метрді құрайды.

"Қазақстанның радиоактивті қалдықтармен жұмыс істеу саласындағы қазіргі қолданыстағы заңнамасы радиоактивті қалдықтарды, соның ішінде АЭС-те ғана емес, медицина, өнеркәсіп, ғылыми зерттеулер сияқты көптеген салаларда пайда болатын қалдықтарды қауіпсіз басқару талаптарын нақты анықтайды. ҚР Ұлттық ядролық орталығы бірнеше жылдар бойы қатты радиоактивті қалдықтар мен пайдаланылған иондаушы көздерді ұзақ мерзімді сақтауымен айналысып келеді. Сонымен бірге, Ұлттық ядролық орталықтың пайдаланылған отынмен жұмыс істеу тәжірибесі бар – пайдаланылған ядролық отын БН-350 реакторынан Семей ядролық полигоны аумағында НЯЦ базасында халықаралық атом энергиясы агенттігінің бақылауы мен кепілдігімен қауіпсіз жағдайда сақталып отыр", – деді агенттікте.

Бұған дейін атом электр станциясының құрылысы қашан аяқталуы мүмкін екенін жазған болатынбыз.