Бүгін Астанада "Орталық Азия – Қытай: Энергетика" форумында ҚР Энергетика министрі Ерлан Ақкенженов саладағы негізгі жобалар туралы баяндады.

Министрдің сөзінше, энергетика саласы – дәстүрлі түрде Қазақстан-Қытай серіктестігінің өзегі. Екі ел қарым-қатынасы қазір бірлескен әрі технологиялық тұрғыдан бай экожүйеге бағыт алды, деп жазады inbusiness.kz сайты.

– Қазіргі кезде Қытай компанияларының қатысуымен жаңартылатын энергия бойынша 30 жоба жүзеге асырылып жатыр, жалпы қуаттылығы – 1700 МВт, – деді Ерлан Ақкенженов.

Оның сөзіне қарағанда, бүгін CNPC компаниясымен негізгі құжаттарға салтанатты түрде қол қойылды. Соның ішінде Шымкент мұнай өңдеу зауытын 12 млн тоннаға дейін кеңейту туралы негіздемелік келісім.

Келісім нәтижесінде:

• Еліміздің шикізат өңдеу, мұнай өнімдерін экспорттау әлеуеті артады;
• Ақтөбе облысында карбамид өндіретін зауытты іске қосуға арналған келісім;
• Үшжақты мәлімдеме: Қазақстан Республикасы Энергетика министрлігінің "QazaqGaz" АҚ және CNPC-мен "Солтүстік-1" жобасы және көмірсутегі саласындағы ынтымақтастықты дамыту бойынша.

Сондай-ақ Қазақстан-Қытай мұнай құбырларын (Атырау-Кеңқияқ, Кеңқияқ-Құмкөл) кеңейту жұмыстары жүргізіліп жатыр.

– Бүгінгі форум өзара әріптестігіміздің жаңа парағын ашып, энергетика, өнеркәсіп, ғылым және білім беру салаларындағы терең ынтымақтастыққа негіз болатын маңызды алаңға айналып отыр, – деді министр.

Айта кетейік Астанада "Орталық Азия – Қытай" екінші индустриялық-инвестициялық ынтымақтастық форумы өтіп жатыр. Мемлекет басшысы Қасым-Жомарт Тоқаевтың шақыруымен Қазақстанға Қытай Халық Республикасының төрағасы Си Цзиньпин келеді. Сапар барысында жоғары деңгейдегі екіжақты кездесулер өткізу жоспарланып отыр. Сондай-ақ екі ел арасындағы жан-жақты стратегиялық серіктестікті одан әрі нығайту мәселелері талқыланады. 17 маусымда Астанада аймақтағы мемлекеттер басшыларының қатысуымен екінші "Орталық Азия – Қытай" саммиті өтеді.